'Marooko oo ku biiraysa Ururu Goboleedka Ecowas'

Khariidad

Urur goboleedka Galbeedka Afrika ee Ecowas ayaa mabda' ahaan u ogolaaday in ay meelmariyaan codsiga xubin ka noqoshada Marooko inkasta oo dalkaasi ku yaallo Waqooyiga Afrika.

Laakiin hogaamiyeyaasha Ecowas ee ku shiraya Liberia ayaa sheegay in saamaynta xubin ka noqoshadeeda ay u baahantahay in dhinacyo badan laga fiiriyo ka hor inta aysan Marooko si rasmi ah ugu soo biirin.

Boqor Maxamed ma uusan ka qaybgalin shirkaasi sababtuna waa in la martiqaaday ra'iisalwasaaraha Israa'iil Benjamin Netanyahu.

Codsigan Marooko ayaa imanaya ka dib markii ay bishii koobaad ee sannadkan dib ugu biirtay Midawga Afrika.

Marooko ayaa Midawga Afrika isaga baxday ka dib markii uu aqoonsaday madaxbannaanida Galbeedka Saxaraha sannadkii 1984tii.

Dalka Marooko ayaa saxaraha Afrika u arka dhul ay taariikh ahaan u leeyihiin soddonkii sano ee u dambeeyayna waxay xooga saareen in ay calaaqaad wanaagsan la yeeshaan Yurub taas oo ay ku badalanayeen xiiriirkii ay Afrika ka goosteen.

Lahaanshaha sawirka AFP
Image caption Boqor Maxamedka Marooko ayaa calaaqaad wanaagsan la samaysanaya dalalka kale ee qaaradda Afrika

Urur goboleedka Ecowas wuxuu ka kooban yahay 15 dal oo ku yaalla Galbeedka Afrika kuwaas oo midkoodna uusan xad la lahayn Marooko.

Dalalkan ayuu ka dhaxeeyaa ganacsi xor ah iyo isu socodka dadka.

Boqor Maxamed ayaa ku dhawaaqay todobaadkii hore in uusan ka qaybgali doonin shirka Liberia, maadaama oo uu joogo Ra'iisalwasaaraha Israa'iil Benjamin Netanyahu.

Marooko ayaan calaaqaad dublamaasiyadeed la lahayn Israa'iil.

Netanyahu ayaa hogaamiyeyaasha dalalka Galbeedka Afrika u jeediyay khudbad Axaddii wuxuuna sheegay in "Israa'iil ay ku soo laabanayso Afrika, Afrikana ay ku laabanayso Israa'iil.