Qadar oo wacad ku martay in aysan 'is dhiibi doonin'

Dalal badan oo Carbeed ayaa mamnuucay duulimaadyadii aadayay iyo kuwii ka imanayay dalka Qadar Lahaanshaha sawirka Reuters
Image caption Dalal badan oo Carbeed ayaa mamnuucay duulimaadyadii aadayay iyo kuwii ka imanayay dalka Qadar

Dawladda Qadar ayaa wacad ku martay in aysan siyaasaddeeda arrimaha dibadda uga "tanaasuli doonin" muranka dublamaasiyadeed ee kala dhexeeya dalalka Carbeed ee ku eedaynaya in ay xiriir la leedahay argagixisada.

Wasiirka arrimaha dibadda Sheekh Maxamed bin Abduraxmaan al-Thani ayaa sheegay in uu jecelyahay in dublamaasiyad lagu dhameeyo xiisadda sii xoogaysanaysa xalna uusan ku jirin mid milatari, sida ay ku warrantay wakaaladda wararka ee Reuters.

Qadar ayaa diiday sheegashooyinka ah in ay hogaaminayso taageerada Islaamiyiinta xagjirka ah.

Dhanka kalana warbaahinta Al Jazeera ayaa sheegtay in lagu soo qaaday weerar dhanka internetka ah.

"Al Jazeera weerar dhanka internetka ah ayaa ku socda waxaana la bartilmaameedsanayaa qaybaheeda kala duwan oo dhan oo ay ka mid yihiin websiteyadeeda iyo baraheeda bulshada", ayay Twitterka ku soo qortay.

Warbaahinta Al Jazeera ayaa qayb ka ahayd muranka hadda taagan, dalalka kale ee Khaliijka ayaana ka mamnuucay dhamaadkii bishii shanaad.

Aljazeera ayaa websaite-keeda ku soo qortay in uu wali shaqaynayo balse uu weerarka lagu hayo uu sii xoogaysanayo isagoo qaabab kala duwan ah".

Dhanka kalana telefeshinka dawladda Qadar ayaa isna sheegay in uu si ku meel gaar ah u xirayo website-kiisa, sababo la xiriira iskudayo lagu doonayo lagu jabsado.

Waxyaabaha kale ee soo kordhay

  • Dawladda Masar ayaa laamaha ammaanka ee Qarammada Midoobay ugu baaqday in ay baaritaan ku samayso sheegashooyin ah in Qadar ay madax furasho u bixisay hal bilyan oo doolar si loo sii daayo xubin ka tirsan qoyska boqortooyada oo la afduubtay isaga oo ugaadhsi ka samaynaya koonfurta Ciraaq.
  • Wasiirka arrimaha dibadda ee Sacuudiga ayaa u duulay Cammaan si uu wadahadallo ula yeesho laakiin saraakiishu faahfaahin kama aysan bixinin.

Cammaan wali qayb kama aha talaabooyinka ka dhanka ah Qadar ee ay dalalka Carbeed qaateen.

Sacuudi Carabiya iyo dalal kale ayaa isu socodkii iyo xiriirkii dublamaasiba ka goostay Qadar Isniintii.

Amiirka dalka Kuwayd ayaa isku dayaya in uu dhexdhexaadiyo murankan ka dhex aloosan Qadar, Sacuudi Carabiya iyo isutagga Imaaraadka Carabta isaga oo dublamaasiyad adeegsanaya.