Shabeel dadcun ah oo maxkamad dil ku xukuntay

Shabeella ayaa afar qof cunay
Image caption Shabeella ayaa afar qof cunay

Maxkamad ku taalla dalka Hindiya ayaa dil ku xukuntay shabeel afar qof ku dilay gobolka Maharashtra.

Dadka u dooda xuquuqda duurjoogta ayaa isku deyay in ay difaacaan shabeelka oo lagu xukumay in aragti lagu toogto, 23-kii June. Balse maxkamad kale ayaa maanta taageertay go'aankaa.

Shabeelka waxaa la qabtay bishii July, ka dib markii uu laba qof ku dilay afar kalena ku dhaawacay weerar uu ku qaaday deegaan ka tirsan magaalada Brahmapuri, ee gobolka Maharashtra.

Balse waxaa sii daayay laanta ilaalinta shabeellada, laba qof oo kale ayuuna dilay ka dib markii la siidaayay.

Dr Jerryl Banait, oo diidan go'aanka maxkamadda ayaa BBC-da u sheegay in uu racfaan ka qaadan doono xukunka maxkamadda sare.

Dadka u dooda xuquuqda duurjoogta waxay sheegeen in ay wanaagsanaan lahayd in deegaan kale la geeyo shabeelka. Laakiin cabsi badan ayay dadku qabaan.

Saraakiisha kaymaha oo raadinaya shabeelka oo lagu magacaabo Kala, waxay sheegeen in uu baxsaday oo uu jaray illaa 500km, tan iyo bishii July.

Hindiya waxaa ku nool boqolkiiba 60, shabeellada caalamka, taas oo halis ku ah deegaamada sii badanaya iyo ugaaratada sharcidarada ah.

Sidoo kale waxaa dila shabeelka dad u dhoofiya Shiinaha oo dadkiisu daawo ka sameystaan.

Ka dib markii degin laga sameystay meelihii ay ku noolaayeen, shabeelka wuxuu dadka kula dagaallamaa khayraadka, sida biyaha, taas oo sababta geeri.

Dilka Shabeelka ee Hindiya ayaa sare u kacay dhowrkii sano ee la soo dhaafay. Sanadkii 2015-kii, waxaa la sheegay in 80 shabeel la dilay, sanadkii ka horeeyayna 78 shabeel la dilay.

Warar kale oo dheeraad ah oo la xiriira qodobkan