Raila: "Kenya nabad kama dhici doonto inta doorashada lagu shubanayo"

Askarta ayaa sun ku kala ceyrinaya dibadbaxayaasha Lahaanshaha sawirka Reuters
Image caption Askarta ayaa sun ku kala ceyrinaya dibadbaxayaasha

Hoggaamiyaha mucaaradka ee kenya, Raila Odinga ayaa difaacay go'aankii uu uga baxay tartanka doorashada madaxtinimada.

Raila oo wareysi siiyay BBC-da ayaa sheegay in uusan doonayn ka qeybgalka doorasho "hannaankeeda lagu sii go'aamiyay ciidda guuleysanaysa".

Wuxuu intaa ku daray "in aysan Kenya nabad ka sii jiri karin inta ku shubashada doorashada ay socoto."

Taageerayaashiisa ayaa weli wado dibadbaxyo ay ka dhigayaan Nairobi iyo galbeedka Kenya, ayagoo diidan go'aan lagu mamnuucay isu soo baxyada.

Wararka ka imaanaya dhanka galbeedka Kenya waxay sheegayaan in booliska ay toogteen laba qof oo ka mid ahaa dibadbaxayaasha.

Deegaanka dadka lagu dilay waa meesha uu ka soo jeedo Raila ee Bondo.

Image caption Ciidamo ayaa la dhigay meelaha inta badan ay dadka isugu soo baxaan

Mucaaradka Kenya waxay dalbanayaan in isbedel lagu sameeyo guddiga doorashada oo ay ku eedeynayaan in ay masuul ka ahaayeen qaladkii ka dhacay doorashadii August.

Doorashadaas waxaa wax kama jiraan ku tilmaamtay maxkamadda sare oo sheegtay in qaladaad la sameeyay markii tirinta ay billaabatay.

Raila ayaana hadda diiday in uu ka qeybgalo midda ku celiska ah. taageerayaashiisa ayuu u sheegay in ay dibadbaxaan illaa shaqada laga joojinayo xubno ka mid ah guddiga.

Madaxweyne Kenyatta iyo guddiga doorashada ayaa sheegay in codeynta u dhicidoonto sidii loo qorsheeyay oo ah 26-ka bishan.

Warar kale oo dheeraad ah oo la xiriira qodobkan