Gujiskii quusay ee Argentine oo laga quustay

. Lahaanshaha sawirka Reuters

Mas'uuliyiinka dalka Argentine ayaa sheegay in ay ka quusteen 'raq iyo ruuxba' markabkii gujiska ahaa ee ku quusay badweynta, kaas oo ay saarnaayeen illaa 40 shaqaale ah.

"Inkasta oo uu aad u badnaa dadaalkii baadi goobka, suurtogal waa noqon weysey in la helo halkii uu ku quusay markabka" ayuu yiri afhayeen u hadlay ciidammada badda Argentine.

Markii ugu dambeysay ee shanqartiisa la maqlay markabka waxa ay ahayd 15 kii bishii November, 2017-ka.

Waxaa la sheegay in muddada la goobayay ay labo jeer ka badantahay waqtiga la rumeysanyahay in ay sii noolaan karaan shaqaalaha marka laga qiyaas qaato hawada ay ku heysteen markabka dhexdiisa.

Hadda waxa la baarayo ayaa ah haraadiga markabka, kaas oo loo maleynayo in uu yaalo gunta badda.

Hase yeeshee qaraabada dadka maqan ayaa ku doodaya in ay dowladda sii waddo hawlgalka baadi goobka, iyaga oo aad uga naxay warka ciidanka ay ku dhawaaqeen.

Lahaanshaha sawirka EPA
Image caption Enrique Balbi afhayeenka ciidammada badda

Dadka qaarkood ayaa ka shakisan sida ay wax u dhaceen, waxayna doonayaan in ay ogaadaan sababta markabka u quusay marka horeba, haddane loo badbaadin kari waayay.

Markabka San Juan ayaa kasoo laabanayay hawlgal roondeyn ah oo uu ku tagay koonfurta ugu shisheysa ee badda.

Taliyaha ciidanka badda Jeneraal Gabriel Galeazzi ayaa sheegay in markabka uu saaxada biyaha yimid, kadibna laga heley fariimo la xiriira in ay cilad heysato.

Lahaanshaha sawirka .
Image caption shaqaalaha San Juan