Maxamuud Cabbaas oo raaligalin siiyay dadka Yuhuudda

Xasuuqii Yuhuudda sawir muujinaya Lahaanshaha sawirka Getty Images
Image caption Xasuuqii Yuhuudda sawir muujinaya

Hoggaamiyaha Falastiin Maxamuud Cabbaas ayaa raaligalin ka bixiyay hadal laga soo xigtay todobaadkii hore, kaas oo caro balaaran ka dhaliyay dalka Israa'iil.

Xafiiska Cabbaas ayaa laga soo saaray war murtiyeed lagu sheegayo in hoggaamiyaha uu raaligalin ka bixinayo haddii laga xumaaday hadal uu sheegay todobaad ka hor.

Maxamuud ayaa laga soo xigtay in uu yiri in Yuhuudii lagu laayay Yurub xiligii xasuuqa ay sababtu ahayd dhaqdhaqaaqooda ganacsi, balse aanan loo laynin nacayb loo qabo iyaga.

Hadda Maxamuud waxa uu war saxaafadeedkiisa ku yiri "Xasuuqii Yuhuudda waa kii ugu xumaa ee ebed soo mara adduunka dambi dhaca".

Israa'iil oo nin Carab ah ku maamuustay abaalmarinta ugu sarraysa

Yuhuudda Jarmalka oo loogu baaqay in aysan xiran astaantooda

Yuhuudda Itoobiya oo dalbatay in Israa'iil la geeyo

Balse wasiirka difaaca Israa'iil Avigdor Lieberman ayaa diiday in uu aqbalo raaligalinta Cabbaas, isaga oo ku tilmaamo nin inkira xasuuqii dhacay.

Hadalkan ayuu Cabbaas ka sheegay magaalada Ramala halkaas oo uu la hadlayay golaha dhexe ee ururka PLO, wuxuuna sheegay in uu kasoo xigtay buugaag ay qoreen dad Yuhuud ah.

Qaramada Midoobay iyo Midoowga Yurub ayaa dhankooda walwal ka muujiyay hadalka kasoo yeeray Maxamuud Cabbaas.

Ma ahan markii koowaad oo uu muran dhaliyo, sanadkii 1980-kii daraasad jaamacadeed oo uu qoray ayuu Maxamuud Cabbaas ku sheegay in xiriir qarsoodi ah uu ka dhaxeeyay Naasiyiintii Jarmalka iyo Sahyuuniyiinta Yuhuudda, wuxuuna su'aal galiyay tirakoobka la sheego ee ah in la dilay 6 milyan oo Yuhuud ah.

Mowduucyada la xiriira