Shirkadda korontada Gaza oo la xirey

Gaza Lahaanshaha sawirka Reuters
Image caption Gaza

Shirkadda qaabilsan dhalinta korontada ee Gaza waxay sheegtey in magaalada inteeda badan ay dhowaan isu beddeli doonto mugdi.

Qeybaha soo harey waxay dabka korontada ka helaan Israel. Shirkaddan dhalisa korontada waxay ku shaqeysaa shidaal si sharcidarro ah looga soo dhoofiyo jidadka dhulka hoostiisa ku yaala ee ka yimaada Masar.

Shidaalkaasi ayaa haatan gebi ahaanba la waayey, sababtuna waxa weeyaan mushkiladda siyaasadeed ee ka aloosan Masar.

Qoysas farabadan iyo ganacsiga kala duwan ayaa waxay haystaan mashiinada dabka dhaliya si ay uga nabad galaan koronto la'aanta.

Laakiin shidaalka ay ku socodsiinayaan mashiinadaas ayaa haatan dhib ah si lagu helo.

Toddobaadkan safaf dhaadheer ayaa lagu arkayey goobaha shidaalka lagu iibiyo, halkaas oo dad badan ay aad uga walaacsanayeen sidii ay shidaal ay gawaaridooda ugu shubtaan uga heli lahaayeen.

War ka soo baxay shirkadda korontada ayaa ugu baaqey Masar inay rukhsad siiso in shidaal badan uu ka yimaado dhankeeda.

Warka waxaa kaloo lagu cambaareeyey talaabada Israel ay xayiraadda ugu hayso dhulka Falastiiniyiinta.

Israel iyo Masar waxay cunaqabateyn ku soo rogeen Gaza kadib markii dhaqdhaqaaqa Islaamiga ee Hamas ay awoodda la wareegeen sannadkii 2007da.

Sannadkii tegey Masar waxay qafiifisey cunaqabateynta , waxayna dadka u oggolaatey inay si sahlan u safri karaan, laakiin dhamaan dhaqdhaqaaqa ganacsiga ee sharciga ah weli waa mamnuuc.