Iran: Ha la joojiyo weerarrada Sacuudiga ee Yemen

Sacuudi Lahaanshaha sawirka Reuters
Image caption Wasiirka Difaaca Sacuudiga ayaa booqdey ciidammada xadka Yemen ka jooga

Iran ayaa ku baaqdey in si deg deg ah loo joojiyo weerarrada waddamada Khaliijka ee ay hogaanka u hayso Sacuudiga.

Wasaaradda arrimaha dibedda ee Iran ayaa sheegtay in weerarrada ay caqabad ku yihiin in nabad lagu dhameeyo khilaafka dalkaasi Yemen.

Afhyeen u hadashay wasaaradda arrimaha dibedda ee Iran ayaa sheegtay in weerarradaasi ay uga sii dari doonaan xaaladda dalkaasi.

Goor sii horreysay, ayaa Sacuudi Carabiya waxay gudaha Yemen ka billowday hawlgal milatari oo ay uga jawaabeyso baaqii madaxweynaha Yemen Cabdu-rabuh Mansur Haadi.

Qaraxyo ayaa laga soo sheegayaa in laga maqlay magaalada caasimadda ah ee Sanca iyo garoonka ugu weyn ee ku yaalla.

Telefishin taageeraya maleeshiyaadka fallaagada Xuutiyiinta ayaa ugu baaqay hawlwadeenada caafimaadka in ay ka shaqo billaabaan cusbitaallada ku yaala magaalada Sanca.

Warbaahinta Sucuudiga ayaa sheegtay in xukumadda Riyaad ay hawada dalka Yemen ka dhigatay meel duulimaadyada ka caagan, waxa ayna maraakiibta uga digtay in ay ku soo dhawaadaan dekadaha Yemen.