Sucuudiga oo ku dhawaaqay Xabadjoojin

Lahaanshaha sawirka AP
Image caption Xaalad nolol oo aad u adag ayaa ka jirto Yaman

Isbeheysiga Sacuudiga uu hogaaminaayo ee duqeynta ku haya Xuutiyiinta Yaman, ayaa ku dhawaaqay in Talaadada ay xabadjoojin billaabi doonaa.

Xabad joojinta ayaa ku kooban shan maalin, taas oo looga golleeyahay in la ogolaado sidii gargaar loo gaarsiin lahaa dadka gudaha Yaman ku dhibaateysan.

Sacuudiga ayaa tilmaamay in duqeynta ay hakin doonaan maalinta Talaadada ah, laakiin macadda in mucaaradka dhankooda ay joojinayaan dagaalka.

Haddii aysan joojinin Xuutiyiinta, Sacuudiga waxa uu shaaciyay inaysan xabad joojinta sii jiri karin. Waxaana meesha ka bixi karto fursadda gargaarka lagu gaarsiinnayo dadka ay gaajada ku hayso gudaha dalka Yaman.

Xoghaya arrimaha dibadda ee Mareykanka John Kerry ayaa tilmaamay in xabad joojinta uu Sacuudiga ku dhawaaqay ay bilaabaneyso maalinta loogu talagalay.

Mr Kerry ayaa xaqiijiyay in arritan xabad joojinta ah ay ku tiirsan tahay sida ay Xuutiyiinta u aqbalaan.

Ka hadalka xabad joojinta ayaa timi, kaddib markii Sacuudiga iyo xalafadiisa ay xoojiyeen weerarada ay ku hayaan goobaha ay ku xoog badan yihiin Xuutiyiinta ee gobolka Sacda.

Sacuudiga ayaa dadka rayidka ah ee gobolkaasi deggan u sheegay inay isaga baxaan halkaasna ay tahay goob militari iyo furun dagaal.