Dhalinyaro loo malaynayo inay Shabaab ku biireen

Lahaanshaha sawirka EPA
Image caption Mid ka mid ah masaajidda Mombasa ee ay booliska dad ka qabqabteen

Mas'uuliyiinta deegaanka Mombasa ayaa waxa ay walaac ka muujiyeen in ka badan 100 dhalinyara ah oo deegaankaasi u dhalatay in aanan meelna lagu sheegin.

Gudoomiyaha deegaankaasi Nelson Marwa, ayaa sheegay in dhalinyaradaasi looga shakisan yahay in ay aadeen Soomaaliya oo ay ku biireen Xarakada Al-Shabaab.

Waxa uu sheegay in inta badan dhalinyaradaasi ay horay booliska u qabteen oo lagu eedeeyay tuhun ah in ay xiriir la lahaayeen Al-Shabaab.

Dhalinyaradaasi ayaanan haatan meelna lagu sheegi karin.

Waalidiin tiradooda lagu qiyaasay 30 ayaa waxa ay usbuucyadii la soo dhaafay ka cabanayeen in ay waayeen carruurtoodii kaddib markii laga soo daayay xabsiga booliska.

Gudoomiyaha deegaanka Mombasa Nelsom Marwa ayaa sheegay in 200 oo dhalinyara ah oo laga qabtay misaajid ku yaal Mombasa sanadkii hore ay haatan baxsadeen.

Bishii November ee sanadkii hore ayaa booliska waxa ay weerareen saddex masaajid oo ay ku eedeeyeen in ay lagu faafinayay xagjirnimo.

Howlgalkaasi ayaa waxaa ku dhintay hal qof, islamarkaana lagu soo qabtay dhalinyaro ka badan 200.

Dhalinyaradaasi ayaa markii dambe waxaa lagu sii daayay codsi ka yimid madaxda deegaanka iyo waalidiintooda, kuwaasi oo haatan uu Mr Marwa ugu baaqay in ay qaataan mas'uuliyadda dhalinyaradaasi la waayay.