Dhaqaatiirta England oo samaynaya shaqo joojin

Lahaanshaha sawirka PA

Ku dhawaad 3,000 oo qaliin ayaa la joojiyay iyadoo dhaqaatiirta England ay bilaabeen 24 saacadood oo shaqo joojin ah, iyagoo ka soo horjeeda heshiis cusub ee dowladda ee ku saabsan lacagta ay ku shaqeeyaan iyo saacadaha ay shaqeeyaan.

Balanadii dhaqaatiirta iyo isbaarista ayaa sidoo kale ay saamaysay shaqo joojinta oo bilaabatay 8:00AM.

Waxyaabaha ugu wayn ee lagu muransan yahay waxaa ka mid ah lacagta ay qaataan dhaqaatiirta maalinta la nasto ee Sabtida.

BBC ayaa aaminsan in wadahadalo ay ka socdaan dowladda dhexdeeda, kadib markii madaxda NHS ee caafimaadka ay u sheegeen wasiirada hadii ay rabaan inay sameeyaan heshiis cusub, waa inay sameeyaan bishan gudaheeda si loo sugo in la bilaabo bilaha kulaylka ee soo socda.

Waxaa jira in ka badan 50,000 dhaqaatiir England oo ay saamaynayso heshiiskan, oo isugu jira kuwa mar dhow jaamacadaha ka soo baxay iyo kuwotobanaan sano shaqaynayay.

Wadahadalada u dhaxeeya dhaqaatiirta iyo dowladda, oo ay dhexdhexaadinayso Acas oo dhexdhedhexaadisa shaqaalaha iyo hayadaha ay u shaqeeyaan, ayaa burburay bishii Janaayo.

Hogaamiyaha ururka dhaqaatiirta ee BMA, ayaa sheegay inaysan dowladda ku qasbin heshiis dhaqaatiirta oo aysan adeega caafimaadka waddanka ee NHS ka hormarin siyaasada.