Obama oo gaaray magaalada Hiroshima

Lahaanshaha sawirka Reuters
Image caption Waa markii ugu horreysay oo madaxweyne mareykan ah uu booqdo Hiroshima.

Madaxweynaha Mareykanka Barack Obama ayaa gaaray magaalada Hiroshima ee dalka Japan, waxa uuna noqonayaa madaxweynihii ugu horreeyay oo Mareykan ah oo booqda goobtii ugu horreysay caalamka ee lagu dhuftay hubka atoomigga.

Obama ayaa ubax dhigi doono goob loo asteeyay in lagu xasuusto 140, 000 oo qof oo u dhintay sababo la xiriira duqeyntaasi Mareykanka ee sanadkii 1945.

Dad kale oo tiro ahaan gaaraya 70, 000 ayaa lagu dilay duqeyn kale oo hubka niyuukleerka loo adeegsaday oo saddex maalmood kaddib lagu qaaday magaalada Nagasaki.

Madaxweyne Obama wax raali gelin ah kama bixin doona duqeymahaasi basle waxa uu horey u sheegay in uu rajeynayo in xusuusta duqeymahaasi ay dunida ka caawin doonto in mustaqbalka la yareeyo dagaal la isu adeegsada hubka Niyuukleerka.