AMISOM oo Soomaaliya ka baxaysa 2020

Lahaanshaha sawirka Reuters
Image caption AMISOM ma hesho dhaqaalihii ay u baratay

Midowga Afrika ayaa rajaynaya in ay dib uga qabsadaan Al Shabab meelaha ay haysataan ee Soomaaliya oo dhan wixii loo gaaro 2018, waxayna markaa kaddib bilaabi doonaan in ay askartooda la baxaan, ayadoo booskoodana ay ku wareegi doonaan millateriga Soomaaliya.

Hawshaas ay midowga Afrika askartooda kula baxayaan ayaa lagu wadaa in ay soo gabagabowdo 2020.

Taasi dabcan waa aragti uun ayuu leeyahay Tomi Oladipo oo ah wariyaha arrimaha ammaanka ee Afrika.

Wuxuu intaas ku daray in marka xaqiiqda jirta loo soo laabto AMISOM ay ragaadiyeen mashaakil ku saabsan qaab dhismeedka iyo loojiistikada.

Dalalka Afrikaanka ah ee ciidamaada soo diray ayaa ku hanjabaya in ay hawlgalka ka bixi doonaan maadaama ay sheegeen in beesha caalamku aysan siinayn taageeradii loo baahnaa.

Midowga Yurub ayaa hoos u dhigay dhaqaalihii uu hawlgalka ku bixin jiray, BBCd-duna waxay dhawaan ogaatay in AMISOM askartooda aan muddo bilo ah lacag la siin.

Sidaas oo ay tahayna Al Shabaab oo cadawgooda ah, weli waxay gacanta ku hayaan gobollada qaarkood, waxayna weli wadaan ol'ole borobogaando ah oo ay ku qoranayaan dagaallamayaal iyo taageerayaal.

Sidaa darteed, ayadoo hawlgalkaas ay dalalka kala duwan ku jiraan uu culays ku yahay Midowga Afrika, ayey hadana ogyihiin in loo baahan yahay in la dhamaystiro hawlgalka si loo dhawro deganaanshaha geeska Afrika.

Ciidanka AMISOM ayaa Muqdisho la geeyay sanadkii 2007, si ay dowladdii xilligaasi uga difaacaan weerarrada Al-Shabaab.