Italia yakanusha maafisa wake kunyanyasa wahamiaji

Zaidi ya wahamiaji 150,000 wameokolewa kutoka bahari ya Mediterranea na kupelekwa Italia mwaka huu
Image caption Zaidi ya wahamiaji 150,000 wameokolewa kutoka bahari ya Mediterranea na kupelekwa Italia mwaka huu

Maafisa wawili wa ngazi za juu nchini Italia wamekanusha vikali ripoti ya shirika la kulinda haki za binaadam, Amnesty International kwamba polisi nchini humo wamewanyanyasa wahamiaji wanaotafuta hifadhi wakichukua alama zao za vidole.

Kundi la kampeni limesema karibu wahamiaji 20 wamelalamika kunyanyaswa, ikiwa ni pamoja na kuwekwa kwenye shoti za umeme na kupigwa vibaya.

Mkuu wa jeshi la polisi nchini Italia Franco Gabrielli amesema maafisa wa polisi hawakuwahi kutumia njia za kimabavu.

Wakati huo huo mkuu wa kitengo cha uhamiaji katika wizara ya mamabo ya ndani, Mario Morcone amesema alishangazwa na kile alichokiita kuwa ni madai ya uongo.

Alisema kuwa Amnesty ilikusanya ripoti yake mjini London na sio Italia, amabapo wawakilishi wa kamisheni ya juu ya umoja wa mataifa inayoshughulikia wakimbizi walisimamia kilichokuwa kinatokea.