Jammeh aiacha hazina ya Gambia tupu, aondoka na mamilioni

Yahya Jammeh aondoka Gambia, nakuacha hazina tupu Haki miliki ya picha Reuters
Image caption Yahya Jammeh ameondoka Gambia, na kuacha hazina tupu

Mshauri maalumu wa Rais wa Gambia Adama Barrow amesema zaidi ya dola za Kimarekani milioni 11 zinaaminika kutoweka katika hazina ya serikali, kufuatia kuondoka madarakani kwa mtawala wa muda mrefu Yahya Jammeh.

Mia Ahmad Fatty amewaambia Waandishi wa habari katika mji mkuu wa Senegal Dakar kwamba wataalamu wa masuala ya fedha wanatathmini kujua ni kiasi gani kwa sasa kimepotea.

Amesema Gambia kwa sasa ina tatizo kubwa kifedha kwa hazina yake kutokuwa na kitu.

Lakini mwandishi wa BBC Alastair Leithead anasema maafisa wa Barrow hawajatoa ushahidi wowote kwamba Bw Jammeh aliondoka na pesa hizo.

Kwa sasa Rais Barrow amekuwa akifanya kazi na timu ya wataalamu wa masuala ya fedha na wengine kutoka Benki kuu ya nchi hiyo kupata kiasi halisi kilichopo.

Habari zinasema magari ya kifahari na mali nyingine zilionekana zikipakiwa katika ndege ya mizigo ya Chad kwa niaba ya Rais Jammeh siku alipoondoka nchini humo.

Maelfu ya watu walikusanyika katika Ikulu ya nchi hiyo jana jioni wakiyaangalia majeshi ya Senegal yakiingia kwa ajili ya kuweka usalama kabla ya kurejea nchini kwa Adama Barrow.

Haki miliki ya picha Reuters
Image caption Adama Barrow, (katikati), amesema anapanga kuchunguza tuhuma za ukiukaji wa haki za kibinadamu zilizotekelezwa wakati wa utawala wa Jammeh

Rais Barrow yupo nchini Senegal na bado haijulikani ni lini hasa atarudi Gambia na kuingia ofisini.

Alisema atarejea tu baada ya kuhakikishiwa usalama wake.

Raia 45,000 wa Gambia walikuwa wametorokea Senegal kutokana na hofu kwamba Bw Jammeh hangeondoka kwa amani.

Lakini sasa baadhi yao wameanza kurejea makwao.

Haki miliki ya picha Reuters
Image caption Wanajeshi wa Senegal wakishika doria karibu na ikulu ya rais mjini Banjul Jumapili

Mada zinazohusiana

Maelezo zaidi kuhusu taarifa hii