Marekani yataka uchunguzi kuhusu ajali ya meli yake ya kivita

USS John S McCain Haki miliki ya picha Malaysian Navy Chief

Jeshi la wanamaji la Marekani limeagiza uchunguzi kufanyika katika kundi lake la meli za kivita katika Bahari ya Pacific baada ya meli yake moja ya kivita kugongana na meli ya kubeba mafuta karibu na Singapore.

Uchunguzi huo utaangazia "ajali zote zinazohusiana (na ajali hiyo) ambazo zimetokea baharini," Waziri wa Ulinzi wa Marekani James Mattis amesema akiwa Amman, Jordan.

Mabaharia kumi wa jeshi la wanamaji la Marekani bado hawajulikani walipo baada ya ajali hiyo iliyotokea mapema Jumatatu asubuhi.

Mabaharia watano walijeruhiwa.

Afisa mkuu wa jeshi la wanamaji John Richardson, mkuu wa shughuli la jeshi hilo, amemwamuru Phil Davidson, mkuu wa makundi ya meli za jeshi hilo baharini kuongoza uchunguzi huo.

Jenerali Mattis amewaambia wanahabari Jumatatu kwamba uchunguzi huo pia utaangazia ajali ya Juni ambapo meli ya kivita ya USS Fitzgerald iligongana na meli ya kubeba mizigo katika eneo la bahari la Japan, ambapo mabaharia saba walifariki.

Bw Richardson amesema anataka kuhakikisha kwamba hakuna matatizo mengine makubwa katika meli zinazohudumu bahari ya Pacific, shirika la habari la AP limesema, likimnukuu afisa wa wizara ya ulinzi wa Marekani.

Meli ya USS John S McCain yenye uwezo wa kurusha makombora ilikuwa baharini mashariki mwa Singapore na ilikuwa ikijiandaa kutia nanga bandarini pale ilipogongana na meli ya kubeba mafuta iliyokuwa inapeperusha bendera ya Liberia.

Juhudi za kuwasaka mabaharia waliotoweka zinaendelea.

Tunafahamu nini kuhusu ajali hiyo?

Ajali hiyo iliripotiwa mwendo wa saa 05:24 saa za huko Jumatatu (21:24 GMT Jumapili) na ilitokea mashariki mwa Mlango wa Bahari wa Singapore, ambapo USS John S McCain ilikuwa inajiandaa kuingia bandarini kama kawaida Singapore.

Maafisa wa Singapore na Marekani wamesema meli hiyo iliharibiwa upande wake wa kuingia kilindini, ambao ni upande wa kushoto wa meli hiyo ukiangalia mbele.

Haki miliki ya picha EPA
Image caption Baadhi ya vyumba viliingia maji

Meli ambayo iligongana na manowari hiyo, Alnic MC, iliharibika tangi lililo karibu na sehemu ya mbele ya meli hiyo, mita saba (23ft) juu ya maji ya bahari, lakini hakuna baharia aliyejeruhiwa wala hakuna mafuta yaliyomwagika.

Meli hiyo yenye urefu wa 182m (600ft), ni ndefu kidogo kuliko manowari hiyo ya Marekani yenye urefu wa 154m.

Kunatokea nini sasa?

Helikopta za jeshi la Marekani zikishirikiana na majeshi ya wanamaji wa Singapore na Malaysia wanafanya juhudi za uokoaji kuwasaka mahabaria waliotoweka.

Haki miliki ya picha Reuters
Image caption Ndege ya jeshi la wanajewa la Singapore ilisafirisha majeruhi hadi hospitalini
Haki miliki ya picha mkuu wa jeshi la wanamaji la Malaysia
Image caption Picha ya meli ya Alnic MC iliyopakiwa kwenye Twitter na mkuu wa jeshi la wanamaji la Malaysia

Meli ya Alnic MC inaelekea bandarini nchini Singapore.

Meli hiyo ilikuwa imebeba karibu tani 12,000 za mafuta kutoka Taiwan hadi Singapore.


Maswali chungu nzima

Ajali hiyo imetokea Marekani ikiendelea kufanya mazoezi ya kila mwaka kati ya majeshi yake na Korea Kusini, kuonyesha ubabe dhidi ya Korea Kaskazini.

USS John McCain ni sehemu ya kundi la meli za 7th Fleet, kundi kubwa zaidi la meli za kivita za Marekani, na ajali hiyo itaibua maswali kuhusu shughuli za jeshi la wanamaji la Marekani eneo hilo.

Meli ya USS Fitzgerald ilikuwa ya kundi hilo pia. Wiki iliyopita, Marekani ilisema mabaharia kadha waliohusika wangeadhibiwa.

Hii inaaminika kuwa ajali ya nne ya aina hiyo iliyohusisha meli za kivita za Marekani katika kipindi cha mwaka mmoja uliopita.

Ukiongeza suitafahamu iliyokuwepo kuhusu meli ya kubeba ndege za kivita ya USS Carl Vinson mapema, Trump aliposema ilikwua inaelekea upande wa Korea Kaskazini, lakini ikawa inaelekea upande kinyume, kunazua maswali zaidi.



USS John S McCain

  • Imepewa jina lake kutoka kwa babake na babu yake John McCain, wote ambao walikuwa maafisa wakuu jeshi la wanamaji. Inafahamika pia kwa jina la utani kama 'Big Bad John
  • Huhudumu kutoka kambi ya jeshi la wanamaji ya Yokosuka, Japan.
  • Ina mabaharia zaidi ya 300, na huwa na uzani wa tani 9,000.
  • Ilikaguliwa mwezi Mei na kubainishwa kuwa sawa kuendelea kuhudumu.

Alnic MC

  • Meli ya kubeba mafuta na kemikali
  • Iliundwa mwaka 2008, rna kusajiliwa Liberia
  • Inamilikiwa na kampuni ya Ugiriki ya Stealth Maritime Corporation
  • Ilikuwa inaelekea Pyeongtaek, Korea Kusini ikiwa njiani kutoka Taiwan kwenda Singapore

Maelezo zaidi kuhusu taarifa hii