Wahisani kuchangia dola milioni 950 Mali

Image caption Uwanja wa ndege wa Timbuktu

Wahisani au wafadhili wa kimataifa, wanaokutana nchini Ethiopia, wametoa ahadi za kuchagia bajeti ya dola milioni 950, inayotarajiwa kufadhili kampeini ya kimataifa ya kukabiliana na wapiganaji wa kiisilamu nchini Mali.

Tayari ahadi za mamilioni ya dola zimetolewa kwa miradi ya Afrika pamoja na kufadhili vikosi vya afrika ambavyo vitashika doria baada ya wanjeshi wa Ufaransa kuondoka.

Wanajeshi wa Mali na Ufaransa,wameudhibiti mji wa Timbuktu, kufuatia juhudi zao siku ya Jumatatu.

Wanatarajiwa kuweka juhudi zao sana katika mji wa Kidal ambayo ni ngome ya wapiganaji

Kongamano la wafadhili wa kimataifa, linafanyika mjini Addis Ababa Ethiopia.

Wakati wa ufunguzi wa mkutano huo, rais wa Ivory Coast, Alassane Ouattara alisema kuwa bajeti ya majeshi ya kimataifa, itafikia dola milioni 950, zaidi ya mara mbili ya makadirio yaliyowekwa na Muungano wa Afrika.

Muungano wa Afrika uliahidi kutoa dola milioni tano, kwenye mkutano huo siku ya Jumatatu na ilitarajiwa kuwa Umoja wa mataifa pamoja na wahisani wengine 60 au 70 walioalikwa kwenye kongamano hilo wangeweza kutoa ahadi zao kusaidia kampeini hiyo.

Image caption Wanajeshi wa Ufaransa walisaidia wanajeshi wa Mali kukomboa mji wa Timbuktu

Kulingana na orodha ya wale ambao tayari wameahidi kutoa msaada, Japan aliahidi kutoa dola milioni 120, Marekani dola milioni 96 na Ujerumani dola milioni 20.

Pesa hizo zitatumika kwa msaada wa kibinadamu kwa vikosi vya Afrika, kuboresha usalama na mustakabali wa Mali.

Mwenyekiti wa tume ya Muuungano wa Afrika, Nkosazana Dlamini-Zuma, aliwaambia wajumbe kuwa walikuwa wamejumuika kuunga mkono Mali na watu wake.