Wanajeshi wa DRC mahakamani kwa ubakaji

Image caption Wanajeshi wa DRC walipigana vikali na waasi wa M23 waliokuwa wametaka sehemu kubwa za nchi na kuwashinda

Wanajeshi 39 wa serikali nchini DRC, waliotuhumiwa kwa uhalifu wa kivita, wamefunguliwa mashitaka Mashariki mwa nchi.

Mengi ya makosa walioshtakiwa nayo, yanahusiana na ubakaji na vitendo vingine vya uhalifu wa kingono dhidi ya wanawake na wasichana 130 mwezi Novemba mwaka 2012.

Waandishi wa habari wanasema kuwa kesi hii dhidi ya jeshi, inakuja baada ya miezi mingi ya shinikizo kutoka kwa jamii ya kimataifa hasa baada ya wanajeshi kadhaa kuachishwa kazi bila ya kufunguliwa mashitaka.

Umoja wa Mataifa hata hivyo ulitishia kusitisha ufadhili wake kwa vikosi vya jeshi la DRC vilivyoshukiwa kufanya uhalifu.

Makundi ya wapiganaji waliojihami, hutumia ubakaji kama silaha ya vita.

Mwandishi wa BBC mjini Goma, Maud Jullien, anasema kuwa makosa walioshitakiwa nayo wanajeshi hao ni pamoja na ubakaji, uporaji na wengi walioshitakiwa ni wanajeshi wa kiwango cha chini katika mahakama ya kijeshi Mashariki mwa mji huo.

Kesi hiyo itaangazia matukio ya mwaka jana wakati waasi wa M23 walipoteka mji wa Goma huku maelfu ya wanajeshi wa serikali wakilazimika kutorokea mjini Minova.

Kwa mujibu wa ripoti ya UN, angalau wanawake 102 na wasichana 33 walibakwa na kutendewa dhuluma zingine za kingono, na wanajeshi Kusini mwa Goma.

Wakili anayewakilisga waathiriwa, Sylvestre Bisimwa,anasema idadi ya waathiriwa iliyonukuliwa na UN ni ndogo sana.

Alisema kua hadi sasa watu 1,014 - wanaume kwa wanawake, - wametajwa kama waathiriwa wa uhalifu wa kivita mjini Minova.

Kesi hii iliahirishwa kwa wiki mbili kufuatia ombi la mawakili kadha wanaowawakilisha waathiriwa kuwa waruhusiwe kwenda Minova kutafuta mashahidi zaidi.

Aidha bwana Bisimwa alielezea kushtushwa na idadi ndogo ya maafisa wakuu wa jeshi waliofikishwa mahakamani.

Wengi wa waathiriwa waliongeza kuwa wabakaji hawakuwa miongoni mwa watu 39 walioshtakiwa.