Marekani kufanya mazungumzo na Iran

Haki miliki ya picha AP
Image caption Iran inadaiwa kuchochea ghasia nchini Iraq ambako wapiganaji wamekuwa wakiwahangaisha watu

Marekani inatathmini kuanzisha mazungumzo ya moja kwa moja na Iran kuhusu mbinu za kukabiliana na tishio kutoka kwa wanamgambo wa dhehebu la kisunni nchini Iraq

Ripoti zinasema kuwa huenda mazungumzo hayo yakang'oa nanga wiki hii.

Iwapo Marekani na Iran watafanya mazungumzo, basi itakuwa ni hatua kubwa ya kuboresha uhusiano kati ya mataifa hayo mawili.

Mara kwa mara Marekani imekuwa ikiishtumu Iran kwa kuchochea ghasia nchini Iraq, lakini inaonekana kuwa mataifa hayo mawili yana nia ya kuzuia makundi ya kiislamu yaliyo na mipango ya kulidhibiti taifa hilo.

Wakati huohuo Marekani imelaani vikali picha za kuogofya zilizowekwa kwenye mtandao na watu wa Sunni ambazo zinaonyesha wapiganaji wakiwaua wanajeshi wa Iraq.

Haki miliki ya picha AP
Image caption Picha za wanajeshi wa Iraq wakielekea kuuawa

Katika picha hizo wanajeshi wanaonekana wakiondoshwa na kuonyeshwa njia na kuamrishwa kulala ndani ya mitaro kabla ya kuuawa kwao.

Jeshi la Iraq limeseama kuwa picha hizo zilikuwa za kweli lakini bado hazijathibitishwa.

Mwandishi wa BBC anasema ikiwa picha hizo ni za kweli, haya yatakuwa mauaji mabaya zaidi kufanywa dhidi ya wanajeshi wa Iraq tangu Marekani kuvamia Iraq mwaka 2003.

Picha hizo ziliibuka huku serikali ya Iraq ikisema imeweza kudhibiti waasi wa Kisuni na kutwaa maeneo waliyokuwa wameyateka nyara.

Wapiganaji wenye itikadi kali waliteka miji mikubwa ikiwemo Mosul na Tikrit, wiki jana, lakini miji kadhaa imedhibitiwa kutoka kwa waasi.

Hata hivyo wapiganaji hao wameteka mji wa Tal Afar, Magharibi mwa Mosul, usiku kucha baada ya mashambulizi makali.