Kikwete aonya dhidi ya 'kulinda kura'

Haki miliki ya picha PSCU
Image caption Kikwete aonya dhidi ya 'kulinda kura'

Huku joto la kisiasa likizidi kupanda hapa Tanzania kuhusiana na uchaguzi mkuu wa urais, agizo la viongozi wa upinzani la kuwataka mashabiki wao wasalie humohumo vituoni kwa lengo la kulinga kura zao zisiibiwe zimekuwa zikivutia hisia kali kutoka kwa tume ya uchaguzi.

Tume ilitoa tamko la kuwataka wananchi warejee makwao wakasubiri matokeo ya kura.

Lakini vyama vikasisistiza kuwa kutokuwepo kwa imani na viongozi wa tume kuu ya uchaguzi NEC ndiko kuliwalazimu kuchukua mkondo huo ambao NEC imedai kuwa inakiuka kanuni za upigaji kura.

Rais anayeondoka madarakani Jakaya Kikwete ameingilia swala hilo.

Rais Kikwete amewaonya vijana dhidi ya kusalia katika vituo vya kupigia kura kwa dhana kuwa ''wanalinda kura'' akisema wala hilo sio jukumu lao.

Image caption Rais Kikwete amewaonya vijana dhidi ya kusalia katika vituo vya kupigia kura kwa dhana kuwa ''wanalinda kura'' akisema wala hilo sio jukumu lao.

''iweje mgombea anasema kuwa eti msalie humo humo vituoni ilikulinda kura ?''

''Tanzania inawapiga kura zaidi ya milioni 22 hawa wote watashinda humohumo vituoni ? Aliuliza Kikwete.

''Hebu tuelewani, hili ni jambo linachekesha sana na halifai kutamkwa na mtu anayewania kuwa kiongozi'' alisema rais.

Awali mwenyekiti wa tume ya taifa ya uchaguzi NEC, Jaji mstaafu Damian Lubuva, alitoa muongozo kamili wa siku ya kupiga kura na akawataka watu warudi makwao wakasubiri matokeo ya uchaguzi.

Image caption Viongozi wa upinzani wamekuwa wakidai kuwa NEC haiaminiki na kwamba itakuwa vigumu vyama hivyo kuwashawishi wafuasi wao kurudi nyumbani

Kikwete alikubaliana naye akisema kuwa jukumu la kulinda kura zisiibiwe litatekelezwa na mawakala wa vyama watakaoruhusiwa kuingia mle ndani katika vituo vya kupigia kura kwa ajili ya kupiga msasa kila mpiga kura anayeingia humo kutekeleza wajibu wake wa kikatiba.

''Mawakala watakuwemo humo kwenye vituo vya kupigia kura kazi yao nini ?,kazi yao ni kuangilia fulani ameandikishwa kupiga kura wapi ? anakitambulisho cha taifa ,haya basi anaruhusiwa kupiga kura katika kituo hicho '' alihoji rais Kikwete

Baadhi ya vyama vimeshikilia kukutu kuwa kamwe havita fuata maagizo hayo kwasababu inakiuka katiba ya taifa inayoruhusu watu kusalia takriban mita mia mbili hivi kutoka kwenye vituo vya kupiga kura.

Image caption Tume imewataka wananchi warudi makwao baada ya kukamilisha kupiga kura

Rais Kikwete alionya kuwa endapo mtu yeyote atajaribu kukiuka sheria hizo basi atakabiliwa na walinda usalama.

Kikwete alikuwa akizungumza baada ya kupokea mwenge wa uhuru huko Dodoma.

Mkurugenzi wa uchaguzi katika tume ya uchaguzi ya NEC Kailima R. Kombwey alitoa taarifa ya kuwashauri wananchi wasiingilie maswala ya ulinzi wa kura kwani maafisa wa kulinda amani watakuwepo.

Viongozi wa upinzani wamekuwa wakidai kuwa NEC haiaminiki na kwamba itakuwa vigumu vyama hivyo kuwashawishi wafuasi wao kurudi nyumbani baada ya kupiga kura ilihali kuna hofu kuwa huenda kura zao zikaibiwa kwa ajili ya kuifaidi chama tawala.