Arsenal yaondolewa Kombe la FA

Alex Oxlade-Chamberlain Haki miliki ya picha AFP
Image caption Kimakosa aliifungia Sunderland bao la pili

Arsenal, kwa mwaka wa saba, inaelekea msimu huu utakwisha pasipo kupata ubingwa katika mashindano yoyote, baada ya Jumamosi kufungwa magoli 2-0 katika uwanja wa ugenini wa Stadium of Light dhidi ya Sunderland, katika mechi ya raundi ya tano ya Kombe la FA.

Arsenal, ikiwa katika nafasi ya nne katika ligi kuu ya Premier ya England, na kukiwa na uwezekano mkubwa wa kuondolewa katika ligi ya mabingwa barani Ulaya, inaelekea huu sio mwaka wao wa kupata chochote.

Kieran Richardson aliandikisha bao la kwanza la Sunderland.

Arsenal walijaribu kupata bao la kusawazisha, lakini mkwaju wa Sebastian Larsson ulielekezwa wavuni na mchezaji wa Arsenal, Alex Oxlade-Chamberlain, akimfunga kipa wake mwenye na kuipatia Sunderland bao la pili.

Ilikuwa ni bahati mbaya sana kwa mchezaji Chamberlain, kijana wa miaka 18, katika siku ambayo ilielekea yeye alikuwa ameonyesha mchezo wa kuvutia sana katika mechi hiyo.

Kwa mara nyingine tena meneja Arsene Wenger anajipata akirushiwa lawama, hasa ikikumbukwa kwamba Jumatano iliyopita ilifungwa magoli 4-0 katika uwanja wa San Siro, Italia, ilipocheza na AC Milan katika mechi ya klabu bingwa barani Ulaya.