தேர்தல் தோல்வியை ஒப்புக்கொள்வது குறித்து உறுதியளிக்க மறுக்கிறார் ட்ரம்ப்

படத்தின் காப்புரிமை AFP
Image caption கசப்பான விவாதம்

அமெரிக்க அதிபர் தேர்தலில் தான் தோற்றுப்போனால் தேர்தல் முடிவை ஒப்புக்கொள்வது குறித்து குடியரசுக் கட்சியின் வேட்பாளர் டொனால்ட் ட்ரம்ப் உறுதியளிக்க மறுத்துவிட்டார்.

அதிபர் தேர்தல் வேட்பாளர்களுக்கிடையே நடந்த, தீப்பொறி பறந்த இறுதி தொலைக்காட்சி விவாதத்தில் அவர் இது போன்ற ஒரு உத்தரவாதமளிக்க மறுத்தது பெரும் பரபரப்பை ஏற்படுத்தியது.

``அது நடக்கும் போது சொல்கிறேன்``, என்று டொனால்ட் ட்ரம்ப், தொலைக்காட்சி விவாதத்தை நெறிப்படுத்திய கிறிஸ் வாலஸிடம் கூறினார்.

கடந்த பல நாட்களாகவே ட்ரம்ப், அமெரிக்க தேர்தல் அமைப்பு தனக்கு எதிராக திரிக்கப்பட்டிருக்கிறது என்று கூறிவந்திருக்கிறார்.

ஜனநாயகக் கட்சி வேட்பாளரான ஹிலரி கிளிண்டன், அமெரிக்காவில் ஒரு அதிபர் பதவிக்குப் போட்டியிடும் வேட்பாளர் இத்தகைய ஒரு நிலைப்பாட்டை எடுக்க முடியும் என்பது குறித்து தான் அதிர்ச்சி அடைவதாகக் கூறினார்.

அமெரிக்க ஜனநாயகத்தின் பெருமையையே டொனால்ட் ட்ரம்ப் இழிவுபடுத்துகிறார் என்றார் ஹிலரி.

லாஸ் வேகாஸில் நடந்த இந்த தொலைக்காட்சி விவாதம், இது வரை இந்த தேர்தலில் வெளிப்பட்டுவரும் கசப்பான தொனியிலேயே தொடர்ந்தது.

ஹிலரி கிளிண்டனை , ஒரு ``அசிங்கமான பெண்`` என்று ட்ரம்ப் வர்ணித்தார்.

இந்த தொலைக்காட்சி விவாதம் நடந்த 90 நிமிட நேரத்தின் பெரும்பகுதி இது போன்ற தனிப்பட்ட தாக்குதல்களால் நிரம்பியிருந்தது.

குடியரசுக் கட்சி வேட்பாளர் ட்ரம்ப், ரஷ்ய அதிபர் புட்டினின் கைப்பாவை என்று ஹிலரி குற்றம் சாட்டினார்.

தனது தேர்தல் பேரணிகளில் ஹிலரி வன்முறையைத் தூண்டிவிடுகிறார் என்று ட்ரம்ப் குற்றம்சாட்டினார்.

கைகுலுக்க மறுப்பு

படத்தின் காப்புரிமை Reuters
Image caption கைகுலுக்க மறுத்த வேட்பாளர்கள்

இந்த தொலைக்காட்சி விவாத்துக்குப் முன்னரும் பின்னும், இரு வேட்பாளர்களும் கைகுலுக்கிக்கொள்ள மறுத்துவிட்டனர்.

அமெரிக்க உச்சநீதிமன்றத்துக்கு பழமைவாத மனோநிலை கொண்ட நீதிபதிகளை நியமிக்க ட்ரம்ப் சூளுரைத்தார். மேலும், கருக்கலைப்பு செய்வதை சட்டபூர்வமாக்கிய ஒரு முக்கிய தீர்ப்பை , இந்த பழமை வாத மனோநிலை கொண்ட நீதிபதிகள் கொண்ட உச்சநீதிமன்றம் தள்ளுபடி செய்யும் என்றும் அவர் கூறினார்.

இந்த உச்சநீதிமன்றம் அமெரிக்கர்கள் துப்பாக்கி வைத்துக்கொள்ளும் உரிமையை பாதுகாக்கும் என்றும் அவர் கூறினார்.

ஆவணங்கள் இல்லாமல் அமெரிக்காவில் இருக்கும் குடியேறிகளை நாட்டிலிருந்து வெளியேற்றி , அமெரிக்க எல்லைகளைப் பாதுகாப்பதாக அவர் ஏற்கனவே சொன்ன உறுதி மொழிகளை மீண்டும் அவர் வலியுறுத்தினார்.

ஹிலரி கிளிண்டன் இதற்கு பதிலடியாக, தான், ஒரு பாலுறவினர் மற்றும் திருநங்கைகள் உரிமைகளுக்காக பாடுபடுவேன் என்றும், கருக்கலைப்பு உரிமையை பாதுகாக்கப் போவதாகவும், மத்திய தர வர்க்க மற்றும் பெண்கள் நலனுக்கு பாடுபடப் போவதாகவும் உறுதியாகக் கூறினார்.

``பெண்கள் என்ன முடிவு எடுக்க வேண்டும் என்பதில் அரசு தலையிட முடியாது`` , என்றார் ஹிலரி