ஐ எஸ் அமைப்பின் தலைவரை இலக்கு வைத்து தாக்குதல்

இஸ்லாமிய அரசு என்று தம்மை அழைத்துக்கொள்ளும் அமைப்பின் தலைவர் அபு பக்கர் அல் பக்தாதியை இலக்கு வைத்து தாக்குதல் நடத்தப்பட்டுள்ளதாக இராக்கிய இராணுவம் தெரிவித்துள்ளது.

படத்தின் காப்புரிமை AP
Image caption ஐ எஸ் அமைப்பின் தலைவர் அல் பக்தாதி

ஒரு வீட்டில் உயர்மட்டக் கூட்டம் ஒன்றை அவர் நடத்திக் கொண்டிருந்தார் எனும் நம்பிக்கையில் இத்தாக்குதல் நடத்தப்பட்டுள்ளதாகக் கூறப்படுகிறது.

இது தொடர்பில் இராக்கிய இராணுவம் வெளியிட்டுள்ள அறிக்கையில், இத்தாக்குதலில் ஐ எஸ் தளபதிகள் 13 பேர் கொல்லப்பட்டுள்ளனர் என்றாலும், அல் பக்தாதி கொல்லப்படவில்லை எனத் தெரிவிக்கப்பட்டுள்ளது.

மேற்கு இராக்கில், சிரியாவுடனான எல்லைப் பகுதியில், கடந்த சனிக்கிழமை தமது F 16 ரக விமானங்கள் இத்தாக்குதலை நடத்தியது என்றும் இராக்கிய இராணுவம் கூறியுள்ளது.

அல் பக்தாதி ஐ எஸ் அமைப்பின் தலைநகரம் எனக் கூறப்படும் சிரியாவிலுள்ள ரக்கா நகரிலிருந்து, வாகனத் தொடரணி ஒன்றில் அல் கயீம் பகுதிக்கு கடந்த வாரம் சென்றார் எனவும் இராக்கிய இராணுவம் தெரிவித்துள்ளது.

முன்னர் நடைபெற்ற பல தாக்குதல்களில் அவர் காயமடைந்துள்ளதாகவும் கூறப்படுகிறது.