BBC tamil

முகப்பு > விளையாட்டு

மஹேல ஜயவர்தன முப்பதாவது சதம்

Facebook Twitter Google+
26 மார்ச், 2012 - 16:57 ஜிஎம்டி
மஹேள ஜெயவர்தன

இலங்கை அணியின் தலைவர் மஹேல ஜயவர்தன தனது கிரிக்கெட் வாழ்க்கையில் 30 ஆவது சதத்தை எடுத்துள்ளார்.

இலங்கைக்கான விஜயம் ஒன்றினை மேற்கொண்டிருக்கும் இங்கிலாந்து அணிக்கு எதிராக காலி மைதானத்தில் திங்கட்கிழமை(26.3.12) தொடங்கிய முதல் டெஸ்ட் போட்டியின் முதலாம் நாள் ஆட்டத்தின் போதே ஜயவர்தன இந்தச் சாதனையை படைத்தார்.

முதல் நாள் ஆட்டத்தின் முடிவில் இலங்கை அணி எட்டு விக்கெட்டுகள் இழப்புக்கு 289 ஓட்டங்களை எடுத்துள்ளது. மஹேல ஜயவர்தன 168 ஓட்டங்கள் எடுத்து ஆட்டம் இழக்காமல் இருக்கிறார்.

தனது 129 ஆவது டெஸ்ட் போட்டியில் விளையாடிவரும் மஹேல ஜயவர்தன அதில் 10,000 க்கும் அதிகமான ஓட்டங்களை எடுத்துள்ளார். 1997 ஆம் ஆண்டு ஆகஸ்ட் மாதம், இந்திய அணிக்கு எதிராக கொழும்பிலுள்ள ஆர்.பிரேமதாஸ விளையாட்டரங்கில் தனது டெஸ்ட் கிரிக்கெட் வாழ்க்கையை அவர் தொடங்கினார்.

2006 ஆம் ஆண்டு ஜூலை மாதம் கொழும்பிலுள்ள எஸ்எஸ்ஸி விளையாட்டு மைதானத்தில் தென் ஆப்பிரிக்க அணிக்கு எதிராக விளையாடிய டெஸ்ட் போட்டியில் அவர் 374 ஓட்டங்களை எடுத்தார். டெஸ்ட் போட்டிகளில் அவர் எடுத்த அதிகபட்ச ஓட்டங்களும் அதுவே.

இங்கிலாந்து அணிக்கு எதிராகவே ஆவர் அதிகபட்ச சதங்களை எடுத்துள்ளார்.

இதுவரை டெஸ்ட் போட்டிகளில் அடித்துள்ள 30 சதங்களில் 7 இங்கிலாந்து அணிக்கு எதிராக அடிக்கப்பட்டவை. அடுத்து இந்தியாவுக்கு எதிராக 6 சதங்களும், தென் ஆப்பிரிக்காவுக்கு எதிராக 5 சதங்களும் அவர் அடித்துள்ளார்.

வங்கதேசத்துடன் நான்கு சதங்களும், நியூசிலாந்து அணிக்கு எதிராக மூன்று சதங்களும் அடித்துள்ள மஹேல ஜயவர்தன, ஆஸ்திரேலிய அணியுடன் ஆடும்போது இரண்டு சதங்களும், மேற்கிந்திய தீவுகள், பாகிஸ்தான் மற்றும் ஜிம்பாப்வே அணிகளுக்கு எதிராக ஒரு சதமும் அடித்துள்ளார் என்பது குறிப்பிடத்தக்கது.

சராசரியாக டெஸ்ட் போட்டிகளில் அவர் 51 ஓட்டங்களை பெற்றுள்ளார். இலங்கை அணிக்கு இதற்கு முன்னரும் அவர் தலைமையேற்றிருந்தார்.

டெஸ்ட் போட்டிகளில் இலங்கை அணியின் சார்பில் அதிகபட்ச சதங்களை அடித்துள்ளவரும் மஹேல ஜயவர்தன தான்.

இது தவிர 373 ஒருநாள் போட்டிகளிலும் அவர் விளையாடி பத்தாயிரத்துக்கும் அதிகமான ஓட்டங்களை எடுத்துள்ளார்.

புதுப்பி

இதைப் பகிர்க

Facebook Google+ Twitter