புதிய அரசியலமைப்பை உருவாக்கும் நடவடிக்கைகளில் தேக்கநிலை- ததேகூ

  • 20 பிப்ரவரி 2017

இலங்கை வந்துள்ள இந்திய வெளிவிவகார அமைச்சின் செயலாளர் ஜெய்சங்கரைச் சந்தித்துக் கலந்துரையாடிய தமிழ்த்தேசிய கூட்டமைப்பினர், தமிழ் மக்களுடைய எரியும் பிரச்சினைகள் குறித்து எடுத்துரைத்ததுடன், புதிய அரசியலமைப்பை உருவாக்கும் நடவடிக்கைகள் தேக்கநிலையை அடைந்துள்ளதாகவும் தெரிவித்திருக்கின்றனர்.

Image caption இந்திய வெளிவிவகார அமைச்சின் செயலாளர் ஜெய்சங்கரைச் சந்தித்துக் கலந்துரையாடிய தமிழ்த்தேசிய கூட்டமைப்பினர்

தமிழ்த்தேசிய கூட்டமைப்பின் தலைவரும், எதிர்க்கட்சித் தலைவருமாகிய இரா.சம்பந்தன் தலைமையில், நாடாளுமன்ற உறுப்பினர்களாகிய மாவை சேனாதிராஜா, சுமந்திரன், செல்வம் அடைக்கலநாதன், சித்தார்த்தன் மற்றும் முன்னாள் நாடாளுமன்ற உறுப்பினர் சுரேஸ் பிரேமச்சந்திரன் ஆகியோர் இந்தச் சந்திப்பில் கலந்து கொண்டனர்.

கொழும்பில் உள்ள இந்தியத் தூதரகத்தில் நடைபெற்ற இந்தச் சந்திப்பில் இலங்கைக்கான இந்தியத் தூதுவர் தரஞ்சித் சிங் சந்து மற்றும் துணைச் செயலாளர், மற்றும் தூதரக அதிகாரிகளும் கலந்து கொண்டனர்.

இச்சந்திப்பின்போது தமிழ் மக்கள் எதிர்நோக்கும் உடனடி பிரச்சினைகளான, வடக்கு கிழக்கில் இராணுவத்தின் வசமுள்ள காணிகள் விடுப்பில் உள்ள மந்த நிலைமை, கதி, காணாமற்போனோர் மற்றும் அரசியல் கைதிகளின் விடுதலை போன்ற விடயங்கள் தொடர்பில் வெளியுறவு செயலரை தெளிவுபடுத்திய கூட்டமைப்பினர், புதிய அரசியல் யாப்பு உருவாக்கமானது தற்போது ஸ்தம்பிதம் அடைந்துள்ளமை தொடர்பில் தமது கரிசனையையும் எடுத்துரைத்தனர்.

இந்த விடயங்கள் குறித்து இலங்கை ஜனாதிபதி மற்றும் பிரதமருடனான தனது சந்திப்பின் போது எடுத்துரைப்பதாக இந்திய வெளியுறவு செயலாளர் கூட்டமைப்பினருக்கு உறுதியளித்துள்ளதாக இந்தச் சந்திப்பு குறித்து தமிழ்த்தேசிய கூட்டமைப்பு வெளியிட்டுள்ள செய்திக் குறிப்பில் தெரிவிக்கப்பட்டுள்ளது.