“இலங்கையில் மலேரியா அச்சுறுத்தல் தொடர்ந்து நிலவுகிறது”

  • 25 ஏப்ரல் 2017

இலங்கை, மலேரியா அற்ற நாடு என உலக சுகாதார அமைப்பினால் அறிவிக்கப்பட்டாலும் மலேரியா அச்சுறுத்தல் தொடர்ந்து இருப்பதாக அந்நாட்டு சுகாதார அமைச்சகம் கூறுகின்றது.

இந்த ஆண்டு இதுவரை 18 மலேரியா நோயாளிகள் கண்டறியப்பட்டுள்ளதாக தெரிவிக்கப்படுகின்றது.

உலக மலேரியா தினம் இன்று ஏப்ரல் 25ம் தேதி அனுசரிக்கப்படுகின்ற நிலையில், இந்த தகவலை சுகாதார அமைச்சகம் வெளியிட்டுள்ளது.

இந்தியா மற்றும் ஆப்ரிக்க நாடுகளிலிருந்து வருகை தரும் சற்றுலா பயணிகள் அல்லது அந்நாடுகளுக்கு சென்று திரும்பியவர்கள் சிலர், இந்நோய் தொற்றுக்கு உள்ளாகியது கண்டறியப்பட்டுள்ளதாகவும் சுகாதார அமைச்சகம் தெரிவிக்கின்றது.

இலங்கையில் 1990 ல் மலேரியா ஓழிப்பு வேலைத் திட்டம் ஆரம்பிக்கப்பட்டு, 2016 செப்டம்பர் மாதம் உலக சுகாதார மையத்தினால் மலேரியா இல்லாத நாடு என்ற அங்கீகாரத்தையும் பெற்றது.

2006 - 2012 ஆம் ஆண்டு வரையிலான காலப்பகுதியில் உள் நாட்டில் வருடமொன்றுக்கு ஆயிரம் மலேரியா காய்ச்சல் நோயாளிகள் அடையாளம் காணப்பட்டிருந்தனர். தற்போது இந்த எண்ணிக்கை பூஜ்யம் என கண்டறியப்பட்டுள்ளதாக உலக சுகாதார மையத்தினால் தெரிவிக்கப்பட்டிருந்தது.

சுற்றுலாத்துறை காரணமாகவே, பிரதானமாக மலேரியா அச்சுறுத்தலுக்கு மீண்டும் முகம் கொடுக்க வேண்டியிருப்பதாக சுகாதார அமைச்சர் டாக்டர் ராஜித சேனாரத்ன தெரிவிக்கின்றார்.

மீண்டும் மலேரியா காய்ச்சல் பரவாமல் இருப்பதை தடுப்பதற்கு பல்வேறு வேலைத்திட்டங்கள் முன்னெடுக்கப்படுவதாகவும் அதற்கு கூடுதலான நிதி செலவிடப்படுவதாகவும் அவர் மேலும் குறிப்பிட்டுள்ளார்.

இது குறித்த பிற செய்திகள்:

மலேரியா இல்லாத நாடு இலங்கை - உலக சுகாதார நிறுவனம் அறிவிப்பு

கச்சத்தீவு, மன்னார் பகுதிகளில் மலேரியா பரவலை தடுக்க நடவடிக்கை

சமூக ஊடகங்களில் பிபிசி தமிழ் :

ஃபேஸ்புக்கில் படித்து கருத்துகள் தெரிவிக்க : பிபிசி தமிழ் முகநூல்

டிவிட்டரில் பிபிசி தமிழை பின்தொடர : பிபிசி தமிழ் ட்விட்டர்

இன்ஸ்டாகிராமில் விருப்பம் தெரிவிக்க : பிபிசி தமிழ் இன்ஸ்டாகிராம்

யு டியூப் பக்கத்தில் காணொளிகளை காண : பிபிசி தமிழ் யு டியூப்