انڈین اداکارہ پرینکا چوپڑا نے ’غیر حساس` پیغام والی شرٹ پر معافی مانگ لی

تصویر کے کاپی رائٹ CONDE NAST TRAVELLER

انڈین اداکارہ پرینکا چوپڑا نے پناہ گزینوں کے بارے میں غیر حساس الفاظ والا بنیان پہن کر ایک جریدے کے لیے ماڈلنگ کرنے پر معافی مانگی ہے۔

پرینکا چوپڑا نے اس حوالے سے خود پر ہونے والی تنقید کے بعد معافی مانگی ہے۔

ان کے بنیان پر لکھے الفاظ ’تارکِ وطن‘ ’پناہ گزین‘ اور ’غیرملکی‘ سرخ لائن سے کٹے ہوئے تھے جبکہ لفظ ’مسافر‘ نمایاں تھا۔

اس تصویر کے سامنے آنے کے بعد جریدے اور اداکارہ پر تنقید کی جا رہی تھی کہ یہ مراعات یافتہ طبقے کا پیغام ہے اور اس کے ساتھ بہت سے لوگوں نے اس جانب بھی اشارہ کیا کہ کوئی خوشی سے پناہ گزیں نہیں بنتا۔

اس حوالے سے پرینکا چوپڑا کا بھارتی نیوز چینل این ڈی ٹی وی سے بات کرتے ہوئے کہنا تھا کہ ’میں لوگوں کے جذبات کو ٹھیس پہنچانے پر بہت معذرت خواہ ہوں، میں ہمیشہ لوگوں پر چھاپ لگانے کی مخالف رہی ہوں۔ میں نہایت برا محسوس کر رہی ہوں۔‘

تصویر کے کاپی رائٹ Twitter

اداکارہ کا مزید کہنا تھا کہ ’اس پیغام کو غلط طریقے سے سمجھا گیا ہے، جریدہ اس بارے میں بہت واضح تھا کہ وہ اس پیغام کے ذریعے غیر ملکیوں سے نفرت کے مسئلے کو اجاگر کرنا چاہتے تھے۔‘

اس حوالے ’کوندے ناست‘ نامی اس جریدے نے بھی وضاحتی پیغام جاری کیا ہے۔ جریدے کے بقول اس فوٹو کے ذریعے وہ یہ پیغام دینا چاہتے تھے کہ ہم سب مسافر ہیں کوئی اپنی مرضی سے سفر کرتا ہے اور کوئی حالات کے ہاتھوں مجبور ہو کر۔

رواں ماہ کے آغاز میں اداکارہ نے اس فوٹو کو ٹویٹ کیا تھا جس کے فوراً بعد ہی سماجی رابطوں کی سائٹس پر اس حوالے سے لوگوں نے اپنی ناراضی کا اظہار کیا تھا۔