وائٹ ہاؤس میں جمعے کو بالی وڈ کے نغموں کی بھی دھوم

ٹرمپ تصویر کے کاپی رائٹ Getty Images
Image caption ٹرمپ کی اسقبالیہ تقریب میں بالی وڈ کے ڈانس نمبر پیش کیے جائیں گے

20 جنوری کے دن جب امریکہ کے نئے صدر ڈونلڈ ٹرمپ وائٹ ہاؤس میں داخل ہوں گے تو اس موقع پر شاندار تفریحی تقریب بھی منعقد ہو گی۔

اس پروگرام میں بالی وڈ کے نغموں کی بھی دھوم مچنے والی ہے۔ اس میں سلمان خان کا مشہور گانا 'جمعے کی رات' بھی بجنے والا ہے اور دلچسپ بات یہ ہے کہ 20 جنوری کو جمعہ ہے۔

2015 میں امریکہ میں ہونے والے عالمی ہپ ہاپ رقص مقابلے میں کانسی کا تمغہ حاصل کرنے والے انڈین گروپ کے سربراہ سریش مکند نے صدر ٹرمپ کی استقبالیہ تقریب کے لیے یہ بالی وڈ ڈانس نمبر تیار کیا ہے۔

ممبئی کے نالاسوپارا کے رہائشی سریش مکند کے اس کارنامے پر ریمو ڈیسوذا نے ان کی زندگی پر ایک فلم بھی بنائی تھی۔

تصویر کے کاپی رائٹ HOTURE IMAGES
Image caption جمعے کی رات نغمہ سلمان خان اور جیکلن پر فلمایا گيا تھا، یہ ان کی فلم کک کا نغمہ ہے

تقریباً سات منٹ کی اس خاص بالی وڈ پرفارمنس میں پانچ نغمے شامل کیے جائیں گے۔ اس میں میکا کی آواز میں سلمان خان پر فلمایا گيا مشہور نغمہ 'جمعے کی رات'، رنویر سنگھ کی فلم باجی راؤ مستانی کا گیت 'ملهاری'، قطرینہ کیف کا مقبول نغمہ 'کالا چشمہ'، فلم سلم ڈاگ ملینیئر کا 'جے هو'، پنجابی گانا 'مُنڈياں تو بچ کے رہیں' اور تیلگو فلم گانا 'ٹاپ لیسی پڑی' کو شامل ہے۔

سپرماڈل اور سنہ 2010 میں مس انڈیا کا خطاب جیتنے والی منسوی منگائی اس پروگرام میں بالی وڈ کے اس رقص کو لیڈ کریں گی۔ منگائی کے ساتھ 30 انڈین نژاد امریکی نوجون اس گانے پر ان کا ساتھ دیں گے۔

تصویر کے کاپی رائٹ Getty Images

معروف کوریوگرافر سریش مکند نے اس سلسلے میں بی بی سی سے خاص بات چیت کی۔

انھوں نے کہا کہ 'ہمیں انڈیا کی مختلف النوع ثقافت بالی وڈ کے نغموں کے ذریعے دکھانی تھی۔'

وہ کہتے ہیں: 'مجھے بہت خوشی ہے کہ پہلی بار بالی وڈ ڈانس اس تقریب میں ہوگا۔ انڈیا سے مجھے پہلا موقع ملا کہ میں اس کو کوریو گراف کروں۔ ہر پہلی چیز لوگ طویل وقت تک یاد رکھتے ہیں اور مجھے یقین ہے اس کے بعد بھی اور بڑے مواقع ملیں گے۔'

اب صدر ٹرمپ بالی وڈ کے لٹکے جھٹکوں سے کتنا خوش ہوں گے یہ تو جمعے کی رات کو ہی پتہ چلے گا۔

متعلقہ عنوانات

اسی بارے میں