بالی وڈ راؤنڈ اپ: سنی لیونی رام گوپال ورما پر بھاری پڑ گئیں

سنی لیونی تصویر کے کاپی رائٹ Getty Images
Image caption سنی لیونی نے بار ہا اپنے جواب میں شائستگی قائم رکھی ہے

بالی وڈ میں رواں ہفتہ ویمنز ڈے یعنی یومِ خواتین کے نام رہا اور اس کا سہرا فلمساز رام گوپال ورما کے سر ہوگا جنھوں نے یومِ خواتین کے موقعے پر تمام خواتین کو مبارکباد دیتے ہوئے انھیں ہدایت کی کہ وہ بھی سنی لیونی کی طرح لوگوں میں خوشیاں بانٹیں۔

رامو کی اس ٹوئٹ کے بعد سوشل میڈیا پھر سرگرم ہو گیا اور لوگوں نے رامو کو بہت لتاڑا۔ کسی نے انھیں انھی کی ماں بہن کی دہائی دی تو کسی نے انھیں گھٹیا پبلسٹی بٹورنے والا کہا۔

سوناکشی کی 'نور' اور عالیہ کا برتھ ڈے

ان سب میں خود سنی لیونی کا جواب قابلِ ستائش رہا۔ سنی نے ایک ویڈیو میں یومِ خواتین کی مبارکباد دیتے ہوئے کہا کہ 'معاشرے میں تبدیلی تبھی آتی ہے جب ہم یک زباں ہوں اور لفظوں کا انتخاب سمجھداری سے کیا جانا چاہیے۔'

تمام بحث میں دو چیزوں پر غور کرنا ضروری ہے ایک تو یہ کہ رام گوپال ورما نے کس ذہینیت کے نتیجے میں سنی لیونی کا حوالہ دیا دوسرے یہ کہ جو لوگ اسے گھٹیا کہہ رہے ہیں کیا ان کے خیال میں سنی لیونی کی زندگی سے مشابہت قابلِ تضحیک ہے۔

تصویر کے کاپی رائٹ Getty Images
Image caption رام گوپال ورما فلم ساز ہیں لیکن ایک عرصے سے ناکامیوں کا منھ دیکھ رہے ہیں

سوال یہ ہے کہ جب سنی کو اپنے ماضی پر کسی طرح کی شرمندگی نہیں تو ان کے ماضی یا کردار پر سوالیہ نشان لگانے کا حق کسی کو کیوں ہو اور رہی بات رامو کی تو اپنی آنے والی فلم 'سرکار تھری' کی پبلسٹی کے لیے انھوں نے ایک بار پھر سنی لیونی پر ہاتھ صاف کرنے کی کوشش کی ہے۔

ویسے لگتا ہے کہ ابھی رامو کا پیٹ نہیں بھرا تھا کہ انھوں نے ٹائیگر شروف کو بھی نشانہ بنا ڈالا۔ ایک میگزین کے سرورق پر ان کی تصویر دیکھنے کے بعد ایک ٹویٹ میں رام گوپال ورما نے کہا کہ 'ارمِلا کے انداز میں تصویر نہ بنوایا کرو اور اپنے پاپا سے مردانگی کا سبق لو۔'

ٹائیگر نے تو ان کی اس ٹویٹ کے جواب میں انتہائی مؤدبانہ انداز میں کہا کہ 'میں کتنی بھی کوشش کرلوں اپنے پاپا جیسا نہیں بن سکتا کیونکہ وہ اصلی ہیرو ہیں اور جہاں تک رام گوپال ورما کا تعلق ہے وہ ایک سینیئر فلمساز ہیں اور ہر کسی کو بولنے کی آزادی ہے۔'

لیکن سونم کپور کہاں چپ بیٹھنے والی تھیں۔ وہ خود کو روک نہیں سکیں اور جھٹ سے ٹویٹ کر ڈالا 'ٹائیگر کو شکر ادا کرنا چاہیے کہ وہ رام گوپال ورما کو پسند نہیں کیونکہ رامو جس کو نہ پسند کریں وہ کامیاب رہتے ہیں۔'

تصویر کے کاپی رائٹ Twitter
Image caption کنگنا نے کرن کے ٹی وی شو میں انھیں ’مووی مافیا‘ کہا تھا

کنگنا اور تنازع

کنگنا راناوت اور تنازعات کا چولی دامن کا ساتھ ہے۔ کرن جوہر کے ساتھ ان کی نوک جھونک میں اب دوسرے لوگوں نے بھی کودنا شروع کر دیا ہے۔

کنگنا نے کرن پر اقربا پروری کرنے اور 'مووی مافیا' ہونے کا الزام لگایا تو کرن نے کنگنا پر 'بیچارگی' اور 'وومن کارڈ کھیلنے' کا الزام لگایا۔

کنگنا نے کرن کے ان الزامات کا جرات کے ساتھ جواب دیا لیکن اب اس بیگانی شادی میں کئی دیوانے عبداللہ بھی شامل ہو گئے ہیں۔

ان میں سب سے پہلے ماضی کے 'فلاپ' اداکار اور ٹی وی میزبان شیکھر سمن بھی شامل ہیں جن کے بیٹے ادھیان سمن بھی کنگنا کے سابق بوائِے فرینڈ ہونے کا دعوی کرتے ہیں۔

یہاں 'دشمن کا دشمن دوست' والی کہاوت صحیح ہوتی نظر آ رہی ہے۔ موقع دیکھتے ہی شیکھر نے بھی بہتی گنگا میں ہاتھ دھوتے ہوئے کنگنا کو منہ بند رکھنے کا مشورہ دے ڈالا۔

تصویر کے کاپی رائٹ Getty Images
Image caption تاپسی پنوں کو فلم پنک میں اداکاری سے شہرت ملی ہے

بات یہیں آ کر نہیں رکی اداکارہ تاپسی پنوں بھی اس بحث میں بغیر پوچھے کود پڑیں اور کہہ دیا کہ بالی وڈ میں کوئی اقربا پروری نہیں ہوتی۔

تپسی پنوں کی اس بات سے مجھے یہ کہاوت یاد آرہی ہے۔ 'شاہ سے زیادہ شاہ کا وفادار۔'

متعلقہ عنوانات

اسی بارے میں