سونو نگم کی اذان کے بارے میں ٹویٹس، سوشل میڈیا پر شدید رد عمل

انڈیا تصویر کے کاپی رائٹ AFP

انڈیا کے معروف گلوکار سونو نگم کی اذان کے بارے میں ٹویٹس اور ان سے متعلق رد عمل پیر کو سارا دن سماجی رابطوں کی ویب سائٹ ٹوئٹر پر گردش کرتے رہے۔

معاملہ شروع ہوا جب انڈیا کے مقامی وقت کے مطابق صبح ساڑھے پانچ بجے انھوں نے اپنی پہلی ٹویٹ کی کہ 'خدا آپ سب کا بھلا کرے۔ میں مسلمان نہیں ہوں اور مجھے اذان کی آواز سن کر صبح اٹھنا پڑتا ہے۔ انڈیا میں مذہبی زبردستی کب ختم ہو گی۔'

تصویر کے کاپی رائٹ Twitter
Image caption سونو نگم کی صبح کی جانے والی پہلی ٹویٹ

اگلے دس منٹ میں انھوں نے چند اور ٹویٹس کی جن میں انھوں نے اپنی ناراضی کا مزید اظہار کیا۔ ایک ٹویٹ میں انھوں نے کہا 'میں کسی ایسے مندر یا گردوارا پر یقین نہیں رکھتا جو بجلی استعمال کر کے اُن لوگوں کو اٹھائیں جو ان کے مذہب کے پیروکار نہیں ہیں۔'

سونو نگم کی جانب سے صبح کی جانے والی آخری ٹویٹ تھی 'غنڈہ گردی ہے بس۔۔۔'

تصویر کے کاپی رائٹ Twitter

ان چار ٹویٹس کے بعد ٹوئٹر پر سونو نگم کا نام ٹرینڈ ہونا شروع ہو گیا۔ پاکستان کے دس سب سے زیادہ ٹرینڈ ہونے والے موضوعات میں سے ایک سونو نگم تھے جبکہ انڈیا میں بھی سونو اذان ڈیبیٹ کے ہیش ٹیگ سے بحث جاری تھی۔

اور ٹوئٹر پر ہر بحث کی طرح، ایک طرف وہ لوگ تھے جو سونو نگم کے حق میں تھے اور دوسری جانب وہ جو ان کی مخالفت کر ہے تھے یا ان کا مذاق اڑا رہے تھے۔

لیکن انڈیا سے سواپنیل نے اپنی دور اندیشی کا مظاہرہ کرتے ہوئے ٹویٹ کی کہ 'سونو نگم کی یہ ٹویٹس سارے دن خبروں میں رہیں گی اور میں اس بحث میں حصہ لینا نہیں چاہتا۔ میں جا رہا ہوں۔'

تصویر کے کاپی رائٹ Twitter

دوسری جانب پاکستان سے عادل نے سونو نگم کے نام کے حوالے سے ٹویٹ کی 'سونو نگم سے سونو ناکام ایک ٹویٹ میں'۔

تصویر کے کاپی رائٹ Twitter

دوسری جانب پاکستان سے ہی اسامہ نے اپنی ٹویٹ میں سونو نگم کی گلوکاری کو تنقید کا نشانہ بناتے ہوئے ٹویٹ کی کہ 'کل میں شاپنگ مال گیا جہاں وہ سونو نگم کے گانے چلا رہے تھے۔ وہ سن کر میرے کانوں سے خون بہنا شروع ہو گیا۔ کب ختم ہو گی یہ زبردستی۔' اسامہ کی اس ٹویٹ کو کافی سراہا گیا اور ساڑھے چار سو سے زائد لوگوں نے اس کو دوبارہ شیئر بھی کیا۔

تصویر کے کاپی رائٹ Twitter

ادھر انڈیا میں سونو نگم کی ٹویٹس کے بعد کئی ایسی ٹویٹس بھی دیکھنے میں آئیں جن میں سونو نگم کے بجائے بالی ووڈ کے اداکار سونو سُود کو مغالطے میں تنقید کا نشانہ بنایا گیا۔

انڈیا سے روپیش نے ٹویٹ کی 'سونو نگم کی ٹویٹ کے بعد سے لوگ سونو سُود کی فلموں کو ویب سائٹ آئی ایم ڈی بی پر درجہ بندی میں صرف ایک سٹار دے رہے ہیں۔ چلیں کوئی تو اچھا کام ہوا اس سے۔'

تصویر کے کاپی رائٹ Twitter

اداکار سونو سُود خود کو سارا دن ملنے والی اس توجہ پر حیران تھے اور انھوں نے دوپہر میں ٹویٹ کر کے اپنی حیرانی کا اظہار کیا۔'میں ابھی بھی یہ سوچ رہا ہوں کہ کس نے کیا کہا اور کس کو کہا اور مجھ سے کون پوچھ رہا ہے کہ معلوم کرو کہ کہاں پر کیا ہوا ہے۔'

تصویر کے کاپی رائٹ Twitter

البتہ سونو نگم کے کچھ چاہنے والوں نے ان کا دفاع کیا۔ انڈیا سے بھیاجی نے ٹویٹ کی 'آپ سونو نگم سے متفق ہوں یا نہ ہوں، ان کی گلوکاری کے بارے میں کوئی سوال نہیں کیا جا سکتا۔ کشور کمار کے بعد سب سے زیادہ ہمہ گیر گلوکار ہیں یہ۔'

متعلقہ عنوانات

اسی بارے میں