معروف شخصیات کا ونود کھنہ کو خراج تحسین

تصویر کے کاپی رائٹ Twitter
Image caption ونود کھنہ کی عمر 70 برس کی تھی اور کینسر کے مرض میں مبتلا تھے

بالی وڈ کے معروف اداکار اور رکن پارلیمان ونود کھنہ کی موت کی خبر آتے ہی لوگوں نے سوشل میڈیا پر سوگ اور افسوس کا اظہار کرنا شروع کر دیا اور تھوڑی ہی دیر میں سوشل میڈیا میں یہ موضوع ٹاپ ٹرینڈز میں شامل ہو گیا۔

ونود مثانے کے کینسر میں مبتلا تھے اور یہی ان کی موت کی وجہ بنا۔

سوشل میڈیا پر ونود کھنہ کے بارے میں خیالات کا اظہار کرنے والوں میں انڈین وزیرِ اعظم نریندر مودی بھی شامل تھے۔

انھوں نے لکھا 'ہم ونود کھنہ کو ایک مقبول اداکار، ایک پرخلوص رہنما اور ایک بہترین انسان کے طور پر ہمیشہ یاد رکھیں گے۔ ان کی موت سے مجھے بہت تکلیف ہوئی ہے۔'

تصویر کے کاپی رائٹ Twitter
Image caption وزیر اعظم نریندر مودی نے بھی افسوس کا اظہار کیا۔

ونود کھنہ اس وقت انڈیا کی حکمراں جماعت بھارتیہ جنتا پارٹی سے بھی وابستہ رہے تھے۔

جماعت کے ترجمان سنبت پاترا نے ٹویٹ کیا کہ: 'عظیم فنکار اور بی جے پی کے رہنما ونود کھنّہ کی موت کی خبر سن کر بہت افسردہ ہوں۔ وہ بالی وڈ کی سب سے زیادہ دلکش شخصیات میں سے ایک تھے۔'

تصویر کے کاپی رائٹ Twitter

اداکارہ ہیمامالنی نے ایک نیوز چینل سے بات کرتے ہوئے ان کی موت پر افسوس کا اظہار کرتے ہوئے کہا: 'ہم نے آخری فلم میں ساتھ میں کام کیا تھا، اس وقت وہ ٹھیک دکھائی دے رہے تھے۔'

اداکار دھرمیندر نے کہا ہے کہ 'ایک سین میں مجھے ان پر حملہ کرنا تھا اور ان کے جسم پر چوٹ کا نشان بن گیا تھا لیکن انھوں نے کسی بھی طرح کی ناراضگی ظاہر نہیں کیا۔'

ونود کھنہ کے ہم عصر اداکار رشی کپور نے ان کے ساتھ بنائی گئی فلم امر اکبر انتھونی کی ایک تصویر کے ساتھ یہ پیغام لکھا، 'امر ہم تمہیں یاد کریں گے۔ تمہاری روح کو سکون پہنچے۔'

تصویر کے کاپی رائٹ Twitter
Image caption ونود کھنہ نے امر اکبر انتھونی میں اکبر کا کردار ادا کیا تھا۔

کرکٹر وریندر سہواگ نے ٹویٹ کیا: 'ونود کھنہ جی کے انتقال پر دل سے غم کا اظہار کرتا ہوں۔ وہ سب سے زیادہ کرشمہ ساز رہنماؤں میں سے ایک تھے۔ اوم شانتی۔'

بی جے پی کے رہنما راجیو پرتاپ روڈی نے لکھا: 'ونود کھنہ کی موت کے بارے میں سن کر انتہائی دکھی ہوں۔ میری ہمدردیاں ان کے خاندان کے ساتھ ہیں۔'

تصویر کے کاپی رائٹ Twitter

کرکٹر محمد کیف نے لکھا: 'ونود کھنہ جیسے خوشگوار شخص کا جانا ناقابل تلافی نقصان ہے۔'

ایک اور ٹوئٹر صارف نے ان کی ایک بلیک اینڈ وائٹ تصویر شیئر کرتے ہوئے لکھا: 'ایک دور کا خاتمہ ہو گیا ہے۔'

ارچی نے ٹویٹ كیا: 'زندگی تو بے وفا ہے ایک دن ٹھكرائے گی۔۔۔ سٹائل آئیکان، ڈیشنگ ونود کھنہ کو ان کے مداح ہمیشہ یاد رکھیں گے۔ اوم شانتی۔'

متعلقہ عنوانات

اسی بارے میں