بالی وڈ راؤنڈ اپ

تصویر کے کاپی رائٹ AFP

پھر روئے عامر خان

یہ ایک ایسی پریس کانفرنس تھی کہ جس میں ہنسی مذاق بھی تھا، جذبات کا غبار تھا اور آنسو بھی تھے۔ یہ سب ہوا جب عامر خان اپنے ٹی وی شو ’ستیہ میوجیتے‘ کے تیسرے ایڈیشن سے متعلق معلومات فراہم کرنے کے مقصد سے میڈیا سے مخاطب ہوئے۔ ’ستیہ میو جیتے‘ کا یہ نیا ایڈیشن 21 ستمبر سے شروع ہوگا۔

اس دوران اس شو کے موضوعات کی تفصیلات بتاتے ہوئے عامر خان کی آنکھوں میں آنسوں آ گئے۔ انھوں نے کہا ’شو کی ریسرچ کے دوران مجھے کئی ایسے واقعات سے روبرو ہونا پڑتا ہے جو ہلا دینے والے ہوتے ہیں۔ وہ غم کو نہیں دکھا سکتے لیکن میرے لیے وہ بڑے جذباتی ہوتے ہیں۔‘

ایسے ہی ایک تجربے کو انھوں نے شیئر کیا۔ ’گزشتہ سیزن میں عصمت دری کے متاثرین پر ریسرچ کے دوران ایک لڑکی کا کیس سامنے آیا۔ عصمت دری کے بعد اسے جلا دیا گیا۔ ہسپتال میں مرتے وقت اس نے اپنا بیان دیا۔ وہ میں نے دیکھا ہے۔ لیکن اسے ہم نہیں دکھا سکتے۔ میرے لیے وہ بہت دردناک تجربہ تھا۔‘

عامر نے یہ بھی کہا کہ اب لوگ انہیں اداکار نہیں بلکہ اس شو کی وجہ سے زیادہ جانتے ہیں۔

کس کے ساتھ بنے گی ایشوریا کی جوڑی

تصویر کے کاپی رائٹ Getty

ایک طویل وقفے کے بعد پردے پر واپسی کرنے والی اداکارہ ایشوریا رائے بچن کو ایک انوکھا ساتھی ملا ہے۔ سنجے گپتا کی فلم ’جذبہ‘ سے واپسی کرنے والی ایشوریا کے ساتھ اس فلم میں اداکار عرفان ہوں گے۔

فلم میں ایشوریا ایک وکیل کا کردار ادا کریں گیں جبکہ عرفان ایک ایسے برخواست پولیس افسر کے کردار میں ہیں جس کی لڑائی نظام کے خلاف ہے۔ اس کی شوٹنگ جلد ہی شروع ہوگی اور ایشوریا رائے نے اپنے رول کے لیے اپنا وزن کافی کم کیا ہے۔

جگجیت سنگھ کے لیے بھارت رتن کا مطالبہ

گلوکار جگجیت سنگھ کی بیوی چترا سنگھ نے ان کے لیے ’بھارت رتن‘ جیسے اعزاز کا مطالبہ کیا ہے۔ مرحوم غزل گلوکار جگجیت سنگھ کی بیوی چترا سنگھ نے ان کے لیے بھارت رتن کا مطالبہ کیا ہے۔

سنہ 2003 میں جگجیت سنگھ کو پدم بھوشن کے اعزاز سے نوازا گیا تھا اور ان کے نام پر ایک ڈاک ٹکٹ بھی جاری کیا جا چکا ہے۔

لیکن چترا سنگھ کہتی ہیں ’جگجیت سنگھ، نریندر مودی سے مل چکے تھے اور دونوں کے درمیان اچھے تعلقات بھی تھے۔ مجھے امید ہیں کہ انہیں بھارت رتن سے نوازا جائے گا۔‘

’ڈوبتے‘ بابی کو ٹی وی کا سہارا

تصویر کے کاپی رائٹ AFP

دھرمیندر کے چھوٹے صاحبزادے بابی دیول نے کئی بار اپنے کریئر کو سنوارنے کی کوشش کی لیکن بات بن نہیں پائی۔

اپنی پہلی فلم سے ہی اب تک بالی وڈ میں پیر جمانے کے لیے جدوجہد میں لگے بابی دیول نے اب تھک ہار کر ٹی وی کا رخ کیا ہے۔ وہ ایک جاسوسی سیریل میں اہم کردار ادا کریں گے۔

بابی کی آخری فلم سنہ 2013 میں ’یملا پگلا دیوانہ نمبر دو‘ آئی تھی۔ اس میں ان کے والد دھرمیندر اور بڑے بھائی سنی دیول بھی شامل تھے۔ لیکن فلم سپرفلاپ ثابت ہوئی۔

مرداني کے ولین پر فدا رانی

تصویر کے کاپی رائٹ AFP

فلم مرداني میں بھلے ہی رانی مکھرجی ولین کا کردار کرنے والے طاہر راج بھسین پر لات گھونسے برساتی ہیں لیکن اسی ولین پر وہ فدا بھی ہیں۔

رانی کہتی ہیں ’مجھے اس بات کی بے حد خوشی ہے کہ انڈسٹری میں موجود لوگوں نے اداکار طاہر کے ٹیلینٹ کو پہچانا۔ فلم میں مجھے تو دیکھا ہی پر طاہر بھی لوگوں کی نظر میں آئے ہیں۔ یہ بہت خوشی کی بات ہے۔‘

خاص بات یہ ہے کہ طاہر کی یہ دوسری ہی فلم تھی اور ان کی تعریف عامر خان نے بھی ٹوئٹر پر کی ہے۔

اسی بارے میں