بالی وڈ راؤنڈ اپ

اپ کی ڈیوائس پر پلے بیک سپورٹ دستیاب نہیں

سلمان کا مراٹھی زبان سے لگاؤ

تصویر کے کاپی رائٹ AFP
Image caption سلمان خان کی فلم کی کک اس سال ریلیز ہونے والی اب تک کی کامیاب ترین فلم ہے

معروف اداکار سلمان خان بالی وڈ میں نئے لوگوں کو لانچ کرنے میں میں تو پیش پیش رہتے ہی ہیں اب وہ ہندی فلموں کے علاوہ علاقائی سینیما میں اپنی دلچسپی کا اظہار کیا ہے۔

حال ہی میں انھوں نے ایک مراٹھی فلم کی میوزک لانچ کی تقریب میں شرکت اور مراٹھی سنیما کی اہمیت و افادیت کے بارے میں خوب تعریف اور توصیفی کلمے کہے۔

سلمان خان نے کہا کہ مراٹھی فلموں سے انھیں بہت لگاؤ ہے۔ اس کے ساتھ انھوں نے یہ بھی خیال ظاہر کیا کہ کہیں نہ کہیں اس زبان کے سینیما کو نظر انداز کیا گیا ہے۔

ان کے خیال میں اس زبان کی فلم میں مزید بلندیاں حاصل کرنے کا مادہ ہے۔

باتوں ہی باتوں میں سلمان نے کہا کہ اگر انھیں کسی مراٹھی فلم میں اہم کردار ملتا ہے تو وہ اس کردار کو ضرور ادا کرنا چاہیں گے۔

عالیہ اور شردھا سے مقابلہ نہیں

تصویر کے کاپی رائٹ Hoture Images
Image caption پرینیتی چوپڑہ نے لیڈیز ورسز رکی بہل فلم سے اپنی مخصوص شناخت بنائی

بالی وڈ کے اداکاروں کی طرح ادکاراؤں کے درمیان بھی نوک جھونک، مقابلہ اور ٹکراؤ کی خبریں آتی رہتی ہیں۔

تاہم جب ان سے اس بارے میں سوال کیا جاتا ہے تو وہ فوری طور پر ایسی کسی چیز کے وجود سے انکار کر دیتی ہیں۔

اپنی ہم عصر اور ہم پلہ ادکاراؤں میں پرینیتی چوپڑہ نسبتا زیادہ کامیاب تصور کی جاتی ہیں اس لیے دوسری ادکاراؤں سے ان کا مقابلہ ہونا لازمی سی بات ہے۔

حالیہ برسوں کے دوران فلم ساز مہیش بھٹ کی بیٹی اداکارہ عالیہ بھٹ کو بھی کسی حد تک کامیابیاں مل رہی ہیں اور معروف ولن شکتی کپور کی بیٹی شردھا کپور کے ہاتھ میں بھی بڑی فلمیں ہیں لیکن پرينیتی چوپڑہ کا کہنا ہے انھیں ان کی جانب سے کوئی چیلنج نہیں ہے۔

پرينیتی کہتی ہیں، انھیں کوئی فرق نہیں پڑتا: ’میں جب عالیہ بھٹ اور شردھا کو دیکھتی ہوں تو میں ایسے نہیں دیکھتی کہ ان سے میرا مقابلہ ہے۔ میں ان کی فلموں میں یہ دیکھتی ہوں کہ کون سا شاٹ اچھا ہے۔ کہاں وہ بہت خوبصورت لگ رہی ہیں۔ میری سوچ ایسی ہی ہے۔‘

پرينیتی نے پانچ فلموں میں اداکاری کی ہے تاہم فلموں میں آنے سے پہلے اداکاری کے بارے میں ان کے خیال ذرا منفی تھی یہاں تک کہ وہ فلم انڈسٹری کے خلاف تھیں۔

بندروں سے پریشان جیکلين

تصویر کے کاپی رائٹ Hoture Images
Image caption جیکلن فرنانڈیس، ریس ٹو اور مرڈر ٹو جیسی فلموں میں کام کر چکی ہیں

سلمان خان کی ہٹ فلم ’کک‘ کی اداکارہ جیكلين فرنانڈس بندروں سے پریشان ہیں۔ وہ ان دنوں ملائیشیا میں اپنی فلم ’رائے‘ کی شوٹنگ میں مصروف ہیں۔

اطلاعات کے مطابق بندر انھیں مسلسل تنگ کر رہے ہیں۔ کبھی وہ جیکلين کا کھانا تو کبھی دوسرا سامان لے کر بھاگ جاتے ہیں۔

دلچسپ بات تو یہ ہے کہ سیٹ پر فلم کے ہیرو رنبیر کپور بھی موجود رہتے ہیں لیکن بندروں کو جیسے ان سے کوئی مطلب ہی نہ ہو۔

ایسا محسوس ہوتا ہے کہ بندروں نے جیکلين کو تنگ کرنے کی ٹھان رکھی ہے۔ لیکن کیوں اس کا جواب تو وہی دے سکتے ہیں۔

میری کام کے بعد کیا کرن بیدی بنیں گی پرینکا؟

تصویر کے کاپی رائٹ AP
Image caption پرینکا چوپڑہ کی تازہ فلم میری کام نے اچھی کامیابی حاصل کی ہے

بھارتی باکسر میری کام کا کردار ادا کرنے کے بعد اب پرینکا چوپڑہ کے سامنے معروف خاتون پولیس آفیسر کرن بیدی کا کردار نبھانے کی باتیں کی جا رہی ہیں۔

اطلاعات کے مطابق پرینکا کو بھارت کی پہلی خاتون آئی پی ایس افسر کرن بیدی کی زندگی پر بننے والی ایک فلم کی تجویز پیش کی گئی ہے۔

پرینکا کے قریبی ذرائع کے مطابق ابھی بات چیت ابتدائی دور میں ہے لیکن پرینکا کو اس کردار کے لیے دس کروڑ روپے کی پیشکش کی گئی ہے۔

بہر حال ابھی تک کرن بیدی نے بھی اس طرح کی کسی پیشکش کی تصدیق نہیں کی ہے۔

اسی بارے میں