’بالی وڈ کو اصل خطرہ تو ہالی وڈ سے ہے‘

اکشے کمار تصویر کے کاپی رائٹ pr
Image caption اکشے کمار کی شبیہ ایک ایکشن ہیرو کے طور پر ہے

بھارتی اداکار اکشے کمار کا کہنا ہے کہ بالی وڈ کو اصل خطرہ جنوبی ہندوستان کی فلم انڈسٹری میں بننے والی فلموں سے نہیں بلکہ ہالی وڈ سےہے۔

ان کا کہنا ہے کہ جنوبی ہندوستان کی زبانوں تمل اور تیلُگو میں بنی فلم ’ بہوبلی‘ کی مقبولیت بالی وڈ کے لیے کبھی بھی خطرہ نہیں بن سکتی ہے کیونکہ ’وہ تو انڈیا کا ہی حصہ ہے اور وہ ہماری ہی انڈسٹری ہی ہے۔ اصل خطرہ تو ہالی وڈ سے ہے۔‘

انھوں نے یہ بات اپنی نئی فلم ’برادرز‘ کی ریلیز سے قبل ایک اشتہاری پروگرام میں کہی۔

ان کا خیال ہے کہ جس طرح کی فلمیں ہالی وڈ میں بنائی جاتی ہیں ان کے لیے بڑا بجٹ درکار ہوتا ہے۔

ان کا مزید کہنا تھا کہ بالی وڈ میں جو ایکشن فلمیں بنتی ہیں وہ اس طرح سے بنائی جاتی ہیں کہ ان کو لوگ اپنے گھروالوں کے ساتھ بیٹھ کر بھی دیکھ سکیں اور فلم کا مزہ لے سکیں اور ان فلموں کا بجٹ بھی ایسا ہوتا ہے کہ جس کا مقابلہ ہالی وڈ سے نہیں کیا جا سکتا۔

اکشے کمار سے جب یہ پوچھا گیا کہ انہوں نے حال ہی میں ’ بے بی ‘ اور ’ ہالی ڈے‘ دو ایسی فلموں میں کام کیا ہے جن کا موضوع شدت پسندی تھا۔ وہ شدت پسندی کے بارے میں کیا کہتے ہیں؟

ان کا کہنا تھا ’ شدت پسندی صرف انڈیا کے لیے ہی نہیں بلکہ پوری دنیا کےلیے بہت بڑا خطرہ بنتی جارہی ہے اور اس کے لیے میڈیا بھی بہت حد تک ذمہ دار ہے‘۔

انھوں نے کہا کہ میڈیا شدت پسندی کی کاروائیوں کو بے حد کوریج دیتا ہے۔ ’شدت پسند جو بھی کرتے ہیں میڈیا ان کو فرنٹ پیج پر جگہ دیتا ہے۔ شدت پسند چاہتے ہیں کہ انہیں کوریج ملے اور میڈیا وہی کر رہی ہے جو وہ چاہتے ہیں۔‘

اکشے کمار کا شمار بہترین اداکاروں میں ہوتا ہے۔ شروعاتی دور میں ان کی شبیہ ایک ایکشن ہیرو کے طور پر تھی لیکن اب وہ کامیڈی فلمیں بھی کرتے ہیں اور فلم ناقدین کا کہنا ہے کہ اکشے کمار ایک بہترین مزاحیہ اداکار ہیں۔

اکشے کا شمار بالی وڈ کے ان اداکاروں میں ہوتا ہے جو فلم پروڈیوسروں کے پسندیدہ اداکار ہیں کیونکہ ان کی فلمیں باکس آفس پر بہترین کمائی کرتی ہیں۔ اس برس ان کی چار فلموں نے سو کروڑ سے زیادہ کی کمائی کی ہے۔

اکشے کمار کہتے ہیں ’ہم لوگ اداکار ہیں کوئی ریس کے گھوڑے نہیں کہ ہمارے نمبروں کا حساب لگایا جائے۔‘

اس برس اکشے کمار کی جو اہم فلمیں ریلیز ہونے والی ہیں ان میں’برادرز‘ اور ’سنگھ از بلنگ‘ اہم ہیں۔

اسی بارے میں