شاہ رخ پر قومی پرچم کی بے ادبی کا الزام

آخری وقت اشاعت:  منگل 21 اگست 2012 ,‭ 14:07 GMT 19:07 PST
شاہ رخ خان

شاہ رخ کے خلاف اس سے پہلے کرکٹ میچ کے بعد گارڈ سے لڑائی جھگڑے کا مقدمہ درج کیا گیا تھا

بھارت کے معروف فلمی اداکار شاہ رخ خان کے خلاف ممبئی کی پولیس نے مبینہ طور پر ملک کے قومی پرچم کی توہین کرنے کا ایک مقدمہ درج کیا ہے۔

یہ معاملہ ایک سیاسی جماعت کے رہمنا روی برہمے نے یو ٹیوپ پر ایک ویڈیوکی بنیاد پر درج کرایا ہے، جس میں شاہ رخ کو بھارت کا قومی پرچم الٹا لہراتے ہو ئے دکھایا گیا ہے۔

ممبئی کی پولیس اس معاملے کی تفتیش کر رہی ہے۔ مقامی پولیس کا کہنا ہے کہ یو ٹیوب پر یہ ویڈیو ایک ٹی وی چینل سے لیا گیا تھا۔ ابتدائی تفتیش کے مطابق یہ ویڈیو گزشتہ برس اپریل میں یو ٹیوب پر اپ لوڈ کیا گیا تھا۔

دلی میں ہمارے نامہ نکار شکیل اختر کا کہنا ہے کہ پولیس کے ایک اہلکار کے حوالے سے بتایا گیا ہے کہ بالی ووڈ کے اداکار کے خلاف قومی وقار کے تحفط کے قانون کے تحت مقدمہ درج کیا گیا ہے۔ یہ مقدمہ چودہ اگست کو درج کرایا گیا تھا۔ مسٹر برہمے نے اس سلسلے میں کئی ویڈیو اور تصویریں بھی جمع کرائی ہیں۔

شاہ رخ خان کی طرف سے فوری طور پر کوئی رد عمل سامنے نہیں آیا ہے۔

مسٹر برہمے نے کچھ عرصے قبل ایک فیشن ماڈل گہنا وشسٹ کے خلاف بھی قومی پرچم کی توہین کا معاملہ درج کرایا تھا۔ گہنا کو گزشتہ ہفتے پولیس نے گرفتار کر لیا تھا اور انہیں اتوار کے روز ضمانت پر رہا کر دیا گیا۔

گہنا کے خلاف بھی قومی پرجم کی توہین اور بے ادبی کا مقدمہ انٹرنیٹ سے حاصل کی گئی تصویروں اور ویڈیو کی بنیاد پر دائر کیا گیا تھا۔

مسٹر برہمے نے الزام لگایا ہے کہ ماڈل گہنا نے قومی پرچم کی بیکنی ( پیراکی کا لباس ) پہن کر قومی پرچم کی توہین کی ہے ۔

اسی بارے میں

متعلقہ عنوانات

BBC © 2014 بی بی سی دیگر سائٹوں پر شائع شدہ مواد کی ذمہ دار نہیں ہے

اس صفحہ کو بہتیرن طور پر دیکھنے کے لیے ایک نئے، اپ ٹو ڈیٹ براؤزر کا استعمال کیجیے جس میں سی ایس ایس یعنی سٹائل شیٹس کی سہولت موجود ہو۔ ویسے تو آپ اس صحفہ کو اپنے پرانے براؤزر میں بھی دیکھ سکتے ہیں مگر آپ گرافِکس کا پورا لطف نہیں اٹھا پائیں گے۔ اگر ممکن ہو تو، برائے مہربانی اپنے براؤزر کو اپ گریڈ کرنے یا سی ایس ایس استعمال کرنے کے بارے میں غور کریں۔