بھارت میں ایس ایم ایس سے ٹرین کی بکنگ

Image caption ایس ایم ایس کے ذریعہ ٹکٹ بک کرانا آسان ہے اور یہ ماحول دوست بھی ہے

بھارت میں ریل ٹکٹ کے لیے اب آپ کو لمبی قطار میں لگنے کی ضرورت نہیں ہے کیونکہ اب موبائل فون سے صرف ایک ایس ایم ایس بھیج کر ٹکٹ بُک کروایا جا سکتا ہے۔

بھارت میں موبائل فون کے بڑھتے رواج کو دیکھتے ہوئے بھارتی ریلوے کیٹرنگ اور سیاحت کارپوریشن یعنی (آئی آر سی ٹی سی) نے ٹکٹ ایس ایم ایس کے ذریعے بک کروانے کا منصوبہ متعارف کروایا ہے۔یکم جولائی سے یہ منصوبہ نافذ العمل ہو گا۔

آئی آر سی ٹی سی کے ایک سینیئر افسر نے بھارتی خبر رساں ادارے پی ٹی آئي سے کہا کہ یہ اقدام ماحول دوست بھی ہے کیونکہ اس میں کاغذ کی بچت کی جا سکے گی۔

موبائل کے ایک خاص نمبر پر ایس ایم ایس بھیج کر بکنگ کروائی جا سکتی ہے۔ اس نمبر کا اعلان جلد کیا جائے گا۔

سفر کے دوران ٹکٹ کی دستاویز ساتھ رکھنے کی ضرورت نہیں ہے اور بکنگ سینٹر کے جوابی پیغام کو ہی سفر کے لیے قابل قبول سمجھا جائے گا۔

موبائل سے ریل ٹکٹ بک کرانے کے لیے اپنے موبائل نمبر اور بینک اکاؤنٹ کو آئی آر سی ٹی سی میں رجسٹرڈ کروانا ہوگا۔

Image caption بھارت میں ریل سب سے بڑا شعبہ ہے

ریلویز کے اہلکار نے کہا کہ ایس ایم ایس بکنگ کا عمل انتہائی آسان ہے اور مسافر کو ایس ایم ایس باکس میں اپنے سفر کی تفصیلات لکھ کر بھیجنی ہوگی۔

اس کے بعد ایس ایم ایس بھیجنے والے کو ایک ٹرانزیكشن شناخت ملے گی جس کے بعد اسے مزید ایک ایس ایم ایس بھیجنا ہوگا جس میں اسے ایم ایم آئي ڈی اور پاس ورڈ فراہم کرانا ہوگا۔

ٹکٹ بکنگ کی یہ سہولت تمام موبائل سروس فراہم کرنے والی کمپنیوں کے لیے دستیاب ہوگی اور ہر ایس ایم ایس کے لیے تین روپے لیے جائیں گے۔ اس کے علاوہ 5000 روپے تک کی ٹکٹ کے لیے پانچ روپے اور اس سے زیادہ رقم کے لیے دس روپے گیٹ وے پیمنٹ کے طور پر ادا کرنا ہوں گے۔

اسی بارے میں