عالمی عدالتِ انصاف میں کلبھوشن سے متعلق انڈین درخواست کا جائزہ لے رہے ہیں: سرتاج عزیز

سرتاج عزیز تصویر کے کاپی رائٹ AFP
Image caption سرتاج عزیز کے مطابق پاکستان اور انڈیا کے وزرائے اعظم کی شنگھائی تعاون تنظیم کے اجلاس کے موقع پر ملاقات کے بارے میں کچھ کہنا قبل از وقت ہوگا

پاکستانی وزیراعظم کے مشیر برائے خارجہ امور سرتاج عزیز کا کہنا ہے کہ انڈیا کی جانب سے کلبھوشن یادو کی سزائے موت رکوانے کے لیے عالمی عدالتِ انصاف سے رجوع کرنے کے معاملے کا جائزہ لیا جا رہا ہے۔

بدھ کو اسلام آباد میں صحافیوں سے بات کرتے ہوئے انھوں نے کہا کہ انڈیا کی جانب سے عالمی عدالت میں جو درخواست دی گئی ہے اس سلسلے میں عدالت کے دائرہ اختیار کا جائزہ لیا جا رہا ہے اور آنے والے ایک دو روز میں دفترِ خارجہ باضابطہ طور پر بیان جاری کرے گا۔

كلبھوشن یادو: بھارت نے عدالتِ انصاف کا دروازہ کھٹکھٹا دیا

ایران کی کلبھوشن یادو تک رسائی کی درخواست

کلبھوشن کی سزا پر انڈین دھمکیاں

پاکستان کی فوجی عدالت نے کلبھوشن یادو کو جاسوسی اور دہشت گردی کی سرگرمیوں میں ملوث ہونے کے جرم میں سزائے موت دینے کا حکم دیا ہے۔

انڈیا اب تک 15 سے زیادہ مرتبہ كلبھوشن یادو تک قونصلر رسائی کا مطالبہ کر چکا ہے، لیکن پاکستان نے اب تک اس کی منظوری نہیں دی ہے۔

شنگھائی تعاون تنظیم کے اجلاس میں پاکستانی اور انڈین وزرائے اعظم کی ملاقات کے امکان کے حوالے سے پوچھے گئے سوال کے جواب میں سرتاج عزیز نے کہا کہ ’اس بارے میں کچھ بھی کہنا قبل از وقت ہے، اگر ان کی طرف سے خواہش ظاہر کی گئی تو پھر دیکھا جائے گا۔‘

تصویر کے کاپی رائٹ Getty Images
Image caption پاکستان کی فوجی عدالت نے کلبھوشن یادو کو جاسوسی اور دہشت گردی کی سرگرمیوں میں ملوث ہونے کے جرم میں سزائے موت دینے کا حکم دیا ہے

سرتاج عزیز کا کہنا تھا کہ افغانستان اور ایران پاکستان کے دشمن نہیں بلکہ دوست ممالک ہیں اور ان دونوں ممالک کے ساتھ 'بارڈر مینیجمنٹ' بہت ضروری ہے۔

وزیراعظم کے مشیر برائے امورِ خارجہ نے بتایا کہ پاکستان اور ایران کا مشترکہ بارڈر کمیشن تشکیل دے دیا گیا ہے جس کا اجلاس ایک ماہ کے اندر ہوگا۔

ان کے مطابق اس کمیشن میں دونوں ممالک سے چار چار ارکان شامل ہوں گے۔

سرتاج عزیز نے کہا کہ پاکستان اور ایران کی سرحد پر صرف دہشت گردوں کا مسئلہ نہیں بلکہ وہاں سمگلر اور دیگر عناصر بھی موجود ہیں۔

انھوں نے کہا کہ شدت پسند تنظیم جیش العدل کے زیادہ تر عناصر ایران کے اندر پھیلے ہوئے ہیں اور ایران میں دہشت گرد افغان ایران سرحد سے بھی داخل ہو سکتے ہیں۔

افغانستان کے ساتھ سرحد پر حالیہ جھڑپ کے بعد کی صورتحال کے بارے میں سوال کا جواب دیتے ہوئے سرتاج عزیز نے کہا کہ چمن میں پاک افغان سرحد جزوی طور پر کھول دی گئی ہے اور پہلے مرحلے میں بیمار افغانوں کو جانے کی اجازت دی گئی ہے۔

سرتاج عزیز کا کہنا تھا کہ پاک افغان معاملے کے حل کے لیے چار فریقی نظام موجود ہے جہاں بات ہو سکتی ہے اور افغان صدر نے دونوں ممالک کے درمیان مذاکرات کے لیے تیسرے فریق کی شرط نہیں رکھی ہے۔

متعلقہ عنوانات

اسی بارے میں