سینیٹ: استعفے کی واپسی کے لیے نہال ہاشمی کی درخواست منظور

رضا ربانی تصویر کے کاپی رائٹ AFP

سینیٹ کے چیئرمین میاں رضا ربانی نے حکمران جماعت مسلم لیگ (ن) کے سینیٹر نہال ہاشمی کا استعفیٰ واپس لینے کی درخواست منظور کر لی ہے۔

بدھ کو سینیٹ کے اجلاس کے دوران چیئرمین رضا ربانی نے 31 مئ کو سینیٹر نہال ہاشمی کی جانب سے دیے جانے والے استعفے کی واپسی کی درخواست منظور کر لی۔

اپنی رولنگ میں چیئرمین سینیٹ نے بتایا کہ نہال ہاشمی نے ان کے چیمبر میں ان سے ملاقات میں اپنے استعفے کی واپسی کی درخواست کی تھی۔

انھوں نے سیکریٹری سینیٹ سے کہا کہ وہ لیڈر آف دی ہاؤس اور مسلم لیگ ن کے پارلیمانی لیڈر کو اس بارے میں آگاہ کر دیں۔

دھمکیاں دی جا رہی ہیں لیکن ڈرنے والے نہیں:سپریم کورٹ

’سپریم کورٹ کے جج کے ریمارکس افسوسناک ہیں‘

نہال ہاشمی کا موقف ہے کہ یہ استعفیٰ انھوں نے غیر معمولی حالات میں دیا تھا اور یہ کہ اس معاملے پر سپریم کورٹ میں سماعت جاری ہے۔

واضح رہے کہ گذشتہ ہفتے نہال ہاشمی کی تقریر کے ایک حصے پر مشتمل ویڈیو منظر عام پر آئی تھی، جس میں انہوں نے پانامہ کیس کی تحقیقاتی کمیٹی کے خلاف دھمکی آمیز لہجہ اختیار کیا تھا۔

بعدازاں وزیر اعظم نے نہال ہاشمی سے سینیٹرشپ سے استعفیٰ طلب کرتے ہوئے ان کی پارٹی رکنیت معطل کردی تھی جس کے بعد نہال ہاشمی نے اپنا استعفیٰ جمع کرادیا تھا۔

تصویر کے کاپی رائٹ Thinkstock
Image caption سپریم کورٹ کے چیف جسٹس نے بھی نہال ہاشمی کی دھمکی آمیز تقریر کا ازخود نوٹس لیتے ہوئے شوکاز نوٹس جاری کیا تھا

سپریم کورٹ کے چیف جسٹس نے بھی نہال ہاشمی کی دھمکی آمیز تقریر کا ازخود نوٹس لیتے ہوئے شوکاز نوٹس جاری کیا تھا۔

نہال ہاشمی سے ملاقات کے بعد چیئرمین سینیٹ رضا ربانی سے وفاقی وزیر قانون زاہد حامد، سینیٹر مشاہد اللہ خان سمیت مسلم لیگ ن کے بعض دیگر رہنماؤں نے بھی ملاقات کی تھی۔ چیئرمین سینیٹ نے نہال ہاشمی کا استعفیٰ واپس لینے کی درخواست سے متعلق وزیر قانون سے مشاورت کی۔

اسی بارے میں