قومی اسمبلی کی پانچ سیٹیں خالی

تصویر کے کاپی رائٹ AFP
Image caption ضمنی انتخابات عمران خان کی مقبولیت کا پہلا امتحان ہوں گے

قومی اسمبلی کی سپیکر ڈاکٹر فہمیدہ مرزا نے عمران خان کی جماعت پاکستان تحریک انصاف میں شامل ہونے والے پانچ اراکین قومی اسمبلی کے استعفے قبول کر لیے ہیں۔

قومی اسمبلی کی طرف سے جاری ہونے والے ایک بیان میں کہاگیا ہے کہ سپیکر قومی اسمبلی نے مخدوم جاوید ہاشمی، مخدوم شاہ محمود قریشی، میمونہ ہاشمی، نوابزادہ محمد خان ہوتی، جہانگیر خان ترین اور سردار آصف احمد علی کے استعفے منظور کر لیے ہیں۔

ان تمام اراکین اسمبلی نے حال ہی میں عمران خان کی سیاسی جماعت پاکستان تحریک انصاف میں شمولیت کا اعلان کیا تھا۔

قانون کے مطابق کسی رکنِ اسمبلی کی نشست خالی ہونے کی صورت میں الیکشن کمیشن ساٹھ روز کے اندر ضمنی انتخاب کرانے کا پابند ہے۔

سیاسی مبصرین کا خیال ہے کہ ضمنی انتخابات عمران خان کی مقبولیت کا پہلا امتحان ہوں گے ۔