راولپنڈی: دھماکے میں 16 افراد زخمی ہو گئے

تصویر کے کاپی رائٹ AP
Image caption گذشتہ ماہ اسلام آباد کی سبزی منڈی میں دھماکے کے نتیجے میں 22 افراد ہلاک ہو گئے تھے

پاکستان کے دارالحکومت اسلام آباد کے جڑواں شہر راولپنڈی میں پولیس حکام کے مطابق ایک ریستوران کے باہردھماکے میں 16 افراد زخمی ہو گئے ہیں۔

راولپنڈی کے تھانہ سٹی کے ایس ایچ او خالد محمود ستی نے بی بی سی سے بات کرتے ہوئے کہا کہ کالج روڑ پر واقع سیور فوڈ کے باہر کھڑی ایک موٹر سائیکل میں دھماکہ ہوا۔

انھوں نے بتایا کہ مقامی وقت کے مطابق رات دس بجے کے قریب ہونے والے اس دھماکے کے نتیجے میں 16 افراد زخمی ہوئے ہیں اور زخمیوں میں سے ایک بچی سمیت تین افراد کی حالت تشویشناک بتائی جا رہی ہے۔

بم ڈسپوزل کے حکام کے مطابق موٹر سائیکل میں نصف کلوگرام کے قریب دھماکہ خیز مواد نصب کیا گیا تھا۔

حکام نے تحقیقات کے لیے جائے حادثہ کے قریب موجود سی سی ٹی وی فوٹیج اور دیگر شواہد جمع کر لیے ہیں۔

خیال رہے کہ راولپنڈی کا علاقہ کالج روڈ ایک مصروف جگہ ہے اور یہاں رات کے وقت لوگوں کی خاصی بھیڑ ہوتی ہے۔

گذشتہ ماہ راولپنڈی سے متصل اسلام آباد کے سیکٹر ایچ 11 میں واقع سبزی منڈی میں دھماکے کے نتیجے میں 22 افراد ہلاک اور 80 سے زیادہ زخمی ہو گئے تھے۔

اسی بارے میں