بلوچستان میں ہندو تاجر کی ہلاکت کے خلاف ہڑتال

تصویر کے کاپی رائٹ BBC World Service
Image caption چند روز قبل بھی مچھ ٹاؤن میں نامعلوم مسلح افراد کے حملے میں ایک ہندو تاجر سنتوش کمہار زخمی ہوا تھا

پاکستان کے صوبہ بلوچستان کے علاقے مچھ میں ایک ہندو تاجر کی ہلاکت کے خلاف اتوار کو شٹر ڈاؤن ہڑتال کی گئی۔

ہڑتال کی کال مچھ ٹاؤن کے تاجروں کی مقامی انجمن نے دی تھی۔ ہڑتال کے باعث مچھ ٹاؤن میں تمام دکانیں بند رہیں۔

مچھ ٹاؤن میں ہندو تاجر کی فائرنگ سے ہلاکت کا واقعہ سینیچر کی شب پیش آیا تھا۔

مچھ میں پولیس کے ایک اہلکار نے فون پر بی بی سی کو بتایا کہ نامعلوم مسلح افراد نے مچھ بازار میں فائرنگ کی جس کے نتیجے میں ہندو تاجر ہری چند ہلاک جبکہ ایک اور شخص عبد الوحید جتوئی زخمی ہوا۔

پولیس اہلکار کا کہنا تھا کہ حملہ آوروں کا ہدف زخمی ہونے والا شخص عبد الوحید جتوئی تھا لیکن فائرنگ کی زد میں ہندو تاجر بھی آگیا۔

اگرچہ پولیس اہلکار کا کہنا تھا کہ ہندو تاجر اس حملے کا ہدف نہیں تھا لیکن چند روز قبل بھی مچھ ٹاؤن میں نامعلوم مسلح افراد کے حملے میں ایک ہندو تاجر سنتوش کمہار زخمی ہوا تھا۔

سنتوش کمہار پر نامعلوم افراد نے ان کے گھر کے قریب فائرنگ کی تھی۔

گذشتہ ماہ بلوچستان کے ایک اور علاقے خضدار میں بھی نامعلوم افراد کی فائرنگ سے ایک ہندو تاجر ہلاک ہوا تھا جبکہ کوئٹہ شہر سے ایک ہندو تاجر کو اغوا کیا گیا تھا۔

اسی بارے میں