کراچی: نجی یونیورسٹی کے قریب کریکر حملہ

تصویر کے کاپی رائٹ AFP
Image caption یونیورسٹی کے قریب فائرنگ ہوئی تھی جس کے بعد انتظامیہ نے پولیس اور رینجرز کو آگاہ کیا

صوبہ سندھ کے شہر کراچی میں ایک نجی یونیورسٹی پر کریکر بھینکنے کا واقع پیش آیا ہے، جس کے نتیجے میں دو محافظ معمولی زخمی ہوگئے ہیں۔

یہ واقعہ پیر کی شب پہلوان گوٹھ کے قریب واقع حبیب یونیورسٹی کے قریب پیش آیا ہے۔

ایس پی گلشن اقبال عابد قائمخانی نے بی بی سی کو بتایا کہ یونیورسٹی کے ساتھ ہی خالی جگہ چھوڑی گئی ہے جہاں کریکر پھینکاگیا ہے ، جس کے نتیجے میں دو محافظ معمولی زخمی ہوئے ہیں۔

انھوں نے بتایا کہ یونیورسٹی کی چاردیواری کی عقبی دیوار کے ساتھ گندا نالہ گزرتا ہے جہاں سے نامعلوم افراد نے یہ کریکر پھینکا۔ اس کے بعد محافظوں نے فائرنگ کی۔

دوسری جانب حبیب یونیورسٹی کے ترجمان سبطین نقوی نے مقامی میڈیا سے بات کرتے ہوئے دعویٰ کیا ہے کہ یونیورسٹی کے قریب فائرنگ ہوئی تھی جس کے بعد انتظامیہ نے پولیس اور رینجرز کو آگاہ کیا۔

انھوں نے بتایا کہ یونیورسٹی میں شام کو کلاسیں نہیں ہوتیں، اس لیے جب فائرنگ ہوئی تو طالب علم موجود نہیں تھے۔

یاد رہے کہ دو سال قبل کراچی ایئر پورٹ پر ایک حملہ کیا گیا تھا، جس کے بعد پولیس کا کہنا تھا کہ ملزمان پہلوان گوٹھ سے ہی اندر داخل ہوئے تھے۔

اسی بارے میں