کرّم میں بارودی سرنگ کا دھماکہ، ایف سی اہلکار ہلاک

تصویر کے کاپی رائٹ AFP
Image caption پاکستان کے قبائلی علاقوں میں سکیورٹی کی صورتحال میں کافی حد تک بہتری آئی ہے

پاکستان کے قبائلی علاقے کرّم ایجنسی میں بارودی سرنگ کے ایک دھماکے میں ایف سی کا ایک اہلکار ہلاک اور دو زخمی ہوگئے ہیں۔

پولیٹکل انتظامیہ کے ذرائع نے بی بی سی کو بتایا کہ یہ واقعہ جمعے کو لوئر کرّم کے علاقے شہیدانو ڈنڈ میں پیش آیا۔

ذرائع کے مطابق بارودی سرنگ چیک پوسٹ کے قریب نصب تھی اور علاقے میں گشت کرنے والے اہلکار اس کا نشانہ بنے۔

اس واقعے کے بعد زخمی اہلکاروں کو ہسپتال منتقل کر دیا گیا۔

پولیٹیکل انتظامیہ کا کہنا ہے کہ دھماکے کے بعد سکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔

کالعدم تحریک طالبان پاکستان نے ایک بیان کے ذریعے دعویٰ کیا ہے کہ بارودی سرنگ سے حملہ اس کے جنگجوؤں نے کیا ہے۔

تنظیم کے ترجمان کی جانب سے جاری کیے گئے بیان میں یہ دعویٰ بھی کیا گیا ہے کہ طالبان نے سکیورٹی فورسز کی چیک پوسٹ پر بھی حملہ کیا ہے تاہم مقامی حکام کی جانب سے ایسے کسی حملے کی تصدیق نہیں کی گئی۔

پاکستان کے قبائلی علاقوں میں سکیورٹی کی صورتحال میں اگرچہ کافی حد تک بہتری آئی ہے تاہم گذشتہ چند ہفتوں سے ان علاقوں میں تشدد کے کئی واقعات پیش آئے ہیں۔

اسی بارے میں