کوئٹہ میں فائرنگ سے ایک لیویز اہلکار ہلاک

تصویر کے کاپی رائٹ EPA
Image caption سریاب کے علاقے میں پانچ روز کے دوران سیکورٹی فورسز کے اہلکاروں کو نشانہ بنانے کا یہ دوسرا واقعہ ہے

پاکستان کے صوبہ بلوچستان کے دارالحکومت کوئٹہ میں فائرنگ کے ایک واقعے میں لیویز فورس کا ایک اہلکار ہلاک ہوا۔

لیویز فورس کے اہلکار پر حملے کا واقعہ سریاب کے علاقے کیچی بیگ میں پیش آیا۔

کوئٹہ پولیس کے ایک اہلکار نے بتایا کہ اس علاقے میں لیویز فورس کا اہلکار محمد عارف ایک میڈیکل اسٹور کے باہر کھڑے تھے جب موٹر سائیکل پر سوار مسلح افراد وہاں آئے اور انھوں نے لیویز اہلکار پر فائرنگ کی۔

فائرنگ کے نتیجے میں لیویز فورس کا اہلکار شدید زخمی ہو ا ور ہسپتال پہنچنے سے پہلے زخموں کی تاب نہ لاکر چل بسا۔

ہلاک ہونے والے اہلکار کی لاش کو پوسٹ مارٹم کے لیے سول ہسپتال کوئٹہ منتقل کیا گیا۔

ہسپتال کے ذرائع کے مطابق اہلکار کو سر اور سینے پر گولیاں ماری گئی تھیں۔

لیویز فورس کے اہلکار کی ہلاکت کا مقدمہ کیچی بیگ پولیس اسٹیشن میں درج کیا گیا اور تاحال فورس کے اہلکار کو ہلاک کرنے کے محرکات معلوم نہیں ہوسکے۔

سریاب کے علاقے میں پانچ روز کے دوران سیکورٹی فورسز کے اہلکاروں کو نشانہ بنانے کا یہ دوسرا واقعہ ہے۔

اس سے قبل نامعلوم مسلح افراد نے حملہ کرکے پولیس کے ایک سب انسپیکٹر کو ہلاک کیا تھا۔

سریاب کا شمار کوئٹہ شہر کے ان علاقوں میں ہوتا ہے جہاں بد امنی کے واقعات زیادہ رونما ہورہے ہیں تاہم سرکاری حکام کا کہنا ہے کہ ماضی کی نسبت حالات میں بہتری آئی ہے

اسی بارے میں