چین میں ٹائٹینک بحری جہاز کی ہوبہو نقل کی تعمیر شروع

ٹائیٹینک
Image caption اصل جہاز کو ہارلینڈ اور وولف نے بیلفاسٹ میں تیار کیا تھا جو بحر اوقیانوس میں حادثے کا شکار ہو گیا تھا

چین کے ایک تھیم پارک میں معروف بحری جہاز ٹائٹینک کی ہو بہو نقل سیاحوں کی توجہ کا اہم مرکز ہونے جا رہی ہے۔

269 میٹر لمبے بحری جہاز کی نقل تیار کرنے کا کام منگل کو چین کے شیچوان صوبے کے ایک دیہی علاقے میں شروع کر دیا گيا ہے۔ یہ جہاز مستقل طور پر وہاں پانی کے اندر رہے گا۔

چین میں روسی تھیم پارک

'نوح کی کشتی' تھیم پارک میں

خیال رہے کہ اصل بحری جہاز کو ہارلینڈ اور وولف کمپنی نے آئرلینڈ کے شہر بیلفاسٹ میں تیار کیا تھا جو اپنے پہلے سفر پر ہی بحر اوقیانوس میں حادثے کا شکار ہو گیا تھا اور اس پر سوار 1500 سے زیادہ افراد ہلاک ہو گئے تھے۔

یہ جہاز اپنے پہلے سفر پر ساؤتھیمپٹن سے نیویارک کے لیے روانہ ہوا تھا کہ وہ برفانی تودے سے ٹکرا کر غرق ہو گیا۔

تصویر کے کاپی رائٹ Reuters
Image caption ٹائٹینک کی نقل والا جہاز مستقل طور پر شیوشوان صوبے کے ایک آبی زخیرے میں رہے گا

اس جہاز کی کہانی میں چین کے بہت سے لوگوں کی زبردست دلچسپی ہے۔

اس دلچسپی میں سنہ 1997 میں اداکارہ کیٹ ونسلیٹ اور اداکار لیونار.و ڈی کیپریو کی فلم کے بعد سے خصوصی اضافہ ہوا اور یہ فلم وہاں بہت مقبول ہوئی تھی۔

فلم کے ہدایت کار جیمز کیمرون نے اس جہاز کی 90 فیصد نقل تیار کی تھی لیکن آج تک اس کی مکمل نقل تیار نہیں کی گئی ہے۔

آسٹریلیا کے ارب پتی کلائیو پامر نے سنہ 2012 میں اس کی ہو بہو نقل تیار کرنے کا اعلان کیا تھا لیکن وہ منصوبہ ابھی تک مکمل نہیں ہو سکا۔

تصویر کے کاپی رائٹ Getty Images
Image caption کمپنی نے پہلے پہل سنہ 2014 میں اس ایک ارب یوان کے منصوبے کا اعلان کیا تھا

چینی نقل میں اصل جہاز کے اندر پرتعیش آرائش و آسائش اور جاہ جلال کے مظاہرے نظر آئيں گے جن میں بال روم، تھیئٹر، سوئمنگ پول، اور فرسٹ کلاس کیبن شامل ہیں۔ اس میں وائی فائی اضافی سہولت ہو گی اور یہ چین کے ساحل سے سینکڑول میل دور ایک تھیم پارک میں لوگوں کی توجہ کا مرکز ہو گا۔

خبررساں ادارے اے ایف پی کے مطابق کمپنی نے پہلے پہل سنہ 2014 میں اس ایک ارب یوان کے منصوبے کا اعلان کیا تھا۔

Image caption یہ جہاز اپنے پہلے ہی سفر پر ساؤتھمپٹن سے نیویارک کے لیے روانہ ہوا تھا کہ برفانی تودے سے ٹکرا کر غرق ہو گیا

خیال رہے کہ چین میں اندرون ملک سیاحت فروغ پر ہے کیونکہ حکومت ترقی کے پرانے ماڈل سرمایہ کاری اور صنعت کے بجائے صارفین کی بنیاد پر ترقی پر زور صرف کر رہی ہے۔

متعلقہ عنوانات