حضرت علی کے یوم ولادت پر یوگی کے ٹویٹ سے 'بھکت ناراض'

یوگی آدتیہ ناتھ تصویر کے کاپی رائٹ PTI
Image caption یوگی آدتیہ ناتھ اترپردیش کے وزیر اعلی ہیں اور سخت گیر ہندو نظریات کے حامل کہے جاتے ہیں

انڈیا کی ریاست اترپردیش کے وزیراعلیٰ یوگی آدتیہ ناتھ کی جانب سے عوام کو حضرت علی کے یومِ ولادت اور ہندوؤں کے تہوار ہنومان جینتی کی مبارکباد دینے پر ملا جلا ردعمل سامنے آیا ہے۔

یوگی آدتیہ ناتھ نے منگل کو حضرت علی کے یومِ پیدائش کے موقع پر مبارکباد کا پیغام پہلے ٹویٹ کیا۔

٭ یوگی پر ٹویٹ کی وجہ سے فلمساز کے خلاف مقدمہ

٭ یوگی آدتیہ ناتھ کے بعض متنازع بیانات

ایک سخت گیر ہندو رہنما کی ساکھ رکھنے والے یوگی کی جانب سے حضرت علی کے یوم ولادت کی مبارکباد نے جہاں انڈین سوشل میڈیا پر کچھ لوگوں کو چونکا دیا وہیں کئی لوگ ان کا شکریہ بھی ادا کرتے نظر آئے۔

یوگی کے مبارکباد والے ٹویٹ پر ہزاروں تبصرے آئے۔

نتن نشانت نے لکھا: 'یہی بدلتے انڈیا کی تصویر ہونی چاہیے۔ ہم ایک بنیں، نیک بنیں! حضرت علی کی سالگرہ اور ہنومان جینتی کی سب کو مبارکباد!

تصویر کے کاپی رائٹ TWITTER/MYOGIADITYANATH
Image caption اترپردیش کے وزیر اعلی نے لکھا: 'حضرت علی کی یوم پیدائش پر ریاست کے لوگوں کو مبارکباد'

جيتیندر چوبے نے لکھا: 'وزیر اعلی ہندو یا مسلمان نہیں ہوتا۔ وہ سارے صوبے کا وزیر اعلی ہوتا ہے اور تمام مذاہب کا محافظ ہوتا ہے۔

یوگی کے ٹویٹ کے جواب میں طارق علی نے لکھا: وزیر اعلی یوگی جی اور تمام ہم وطنوں کو ہنومان جینتی کی مبارکباد'

طارق کی طرح ہی سلمان حیدر زیدی، امبر رضوی اور جنید احمد نے بھی یوگی کی ٹویٹ کے جواب میں ہنومان جینتی کی مبارکباد دی۔

ایک اور صارف نتھو رام نے لکھا: 'سیکولر انڈیا میں آپ کی جانب سے فرقہ وارانہ ہم آہنگی اور سارے مذاہب کو ایک نظر سے دیکھنے کی مثال پیش کرنے کے لیے آپ کا سو مرتبہ استقبال'۔

تصویر کے کاپی رائٹ Twitter
Image caption ایک صارف نتھو رام نے لکھا: سیکولر انڈیا میں آپ کی جانب سے فرقہ وارانہ ہم آہنگی اور سارے مذہب کو ایک نظر سے دیکھنے کی مثال پیش کرنے کے لیے آپ کا صد ہا استقبال

لیکن بہت سے لوگوں کو آدتیہ ناتھ کا یہ انداز پسند بھی نہیں آیا۔

ویر یودھا یعنی بہادر جنگجو کے نام کے اکاؤنٹ سے لکھا گیا: آج آپ کو بھی سیکولر (انداز میں) مبارکباد دیتے ہوئے دیکھ کر مجھے یہ یقین ہو گیا ہے کہ اقتدار ملتے ہی بڑے سے بڑا سخت گیر نظریات والا ہندو بھی سیکولر بن جاتا ہے۔

پردیپ کمار نے ٹویٹ کیا: 'سر یہ تو کچھ زیادہ ہو گیا، آج حامد انصاری سے ہنومان جینتی کی مبارکباد حاصل کیجیے۔'

آر ایس شرما نے یوگی آدتیہ ناتھ کو یاد دلایا کہ ان کے منہ سے جے شری رام اچھا لگتا ہے۔

انھوں نے ٹویٹ کیا: سر آپ سے اترپردیش (یوپی) کے عوام کو بہت زیادہ امیدیں ہیں۔ آپ جو تھے وہ یوپی کے عوام کو منظور ہے۔ آپ کے منہ سے جے شری رام اچھا لگتا ہے۔'

متعلقہ عنوانات

اسی بارے میں