افغانستان میں پاکستانی قونصل خانے کے دو اہلکار دو دن سے لاپتہ

افغان پاک سرحد تصویر کے کاپی رائٹ Getty Images
Image caption وزارت خارجہ کے مطابق پاکستانی قونصل خانے کے لاپتہ افراد سڑک کے راستے پاکستان کا سفر کر رہے تھے

پاکستانی وزارت خارجہ کا کہنا ہے کہ افغانستان میں پاکستانی قونصل خانے کے دو اہلکار دو دنوں سے لا پتہ ہیں۔

وزراتِ خارجہ کی جانب سے جاری بیان میں کہا گیا ہے 'جلال آباد میں ہمارے قونصل خانے کے دو اہلکار 16 جون سنہ 2017 سے لاپتہ ہیں۔ وہ سڑک کے راستے پاکستان آرہے تھے۔'

18 جون کے بیان میں کہا گیا ہے کہ 'افغانستان کے متعلقہ شعبے کے سامنے ان کی جلد از جلد بحفاظت بازیابی کی بات اٹھائی گئی ہے۔'

بیان میں یہ بھی کہا گیا ہے کہ افغان حکام نے انھیں مطلع کیا ہے 'اس واقعے کی جانچ کے لیے کوششیں جاری ہیں اور تین مختلف تفتیشی گروپ کو ان کی بحفاظت بازیابی کا کام سونپا گيا ہے۔'

پاکستان نے حکومت افغانستان سے ان دونوں اہلکار کی جلد بازیابی کو یقینی بنانے کے لیے تمام تر کوششوں کی درخواست کی ہے اور کہا کہ 'اس سنگین جرم کے مرتکبین کو ان کے کیفر کردار پہنچایا جائے۔'

بیان میں کہا گیا ہے وزارت خارجہ افغان حکام کے ساتھ مستقل رابطے میں ہے۔

متعلقہ عنوانات

اسی بارے میں