ممبئی: چارمنزلہ عمارت منہدم، 17 افراد ہلاک

ممبئی تصویر کے کاپی رائٹ EPA
Image caption حکام کے مطابق ابھی بھی ملبے کے نیچے سے لوگوں کو نکالنے کا کام جاری ہے

انڈیا کے صنعتی شہر ممبئی میں ایک چار منزلہ رہائشی عمارت کے منہدم ہو جانے کے سبب مرنے والوں کی تعداد 17 ہوگئی ہے۔

ممبئی میونسپل کارپوریشن کے اہلکار نے انڈین خبر رساں ایجنسی پی ٹی آئی کو بتایا کہ بدھ کی صبح مزید پانچ لاشیں نکالی گئی ہیں۔

انھوں نے کہا کہ 'نیشنل ڈیزاسٹر ریسپانس فورس کے جوانوں نے 28 افراد کو ملبے سے نکالا جس میں سے 17 کو مردہ قرار دیا گیا ہے جبکہ 11 افراد کو قریبی ہسپتال میں داخل کرایا گيا ہے۔'

٭ ممبئی عمارت حادثے میں 54 ہلاک، 32 زخمی

٭ ممبئی: عمارت منہدم ہونے سے 40 افراد ہلاک

انھوں نے بتایا کہ ملبے کے نیچے دبے مزید افراد کی تلاش جاری ہے۔

عمارت گرنے کا یہ واقعہ منگل کوگھاٹ کوپر کے علاقے میں پیش آیا۔

خبر رساں ادارے اے این آئی کے مطابق پولیس نے عمارت کے منہدم ہونے کے سلسلے میں ریاست میں حکمراں جماعت شیو سینا کے ایک رہنما سنیل شیتپ کو حراست میں لیا ہے اور ان کے خلاف مقدمہ درج کیا ہے۔

وہاں کے رہائشیوں کا کہنا ہے کہ سدھی سائی کواپریٹو ہاؤزنگ سوسائٹی کی یہ عمارت ستون کمزور ہو جانے کے سبب گر گئی۔ ان کا کہنا ہے کہ اس کے گراؤنڈ فلور میں ایک نرسنگ ہوم کے لیے تجدید کاری کا کام جاری تھا۔

تصویر کے کاپی رائٹ EPA
Image caption مخصوص کتے کا ملبے کے نیچے زندگی کے آثار کی تلاش کے لیے استعمال کیا جا رہا ہے

خیال رہے کہ گذشتہ ایک ہفتے سے ممبئی اور مغربی علاقوں میں شدید بارش بھی ہو رہی جس کی وجہ سے ملحقہ ریاست گجرات کے کئی علاقوں میں سیلاب آ گیا ہے جس میں درجنوں افراد ہلاک ہو گئے ہیں جبکہ وزیر اعظم نے سیلاب سے نمٹنے کے لیے 500 کروڑ روپے کی امداد کا اعلان کیا ہے۔

مہاراشٹر کے وزیر اعلی دیویندر فڈنوس نے رات جائے حادثہ کا دورہ کیا اور کہا کہ 'اس کی رپورٹ درج کر لی گئی ہے اور پولیس جانچ کر رہی ہے۔ میں نے بی ایم سی کے کمیشنر کو ہدایت دی ہے کہ وہ 15 دنوں کے اندر رپورٹ جمع کریں۔'

انڈیا میں میں ناقص تعمیراتی سامان اور طریقۂ کار کی وجہ سے عمارتیں گرنے کے واقعات اکثر پیش آتے رہتے ہیں۔ ستمبر سنہ 2013 میں ایک چار منزلہ عمارت کے گرنے سے 54 افراد ہلاک اور متعدد زخمی ہو گئے تھے۔

اس سے قبل اپریل ماہ میں اسی شہر میں ایک عمارت منہدم ہونے کے سبب 40 افراد ہلاک ہو گئے تھے۔

متعلقہ عنوانات

اسی بارے میں