نتیش کمار نے ایک دن بعد ہی دوبارہ وزیراعلیٰ کے عہدے کا حلف اٹھا لیا

تصویر کے کاپی رائٹ PTI
Image caption نتیش کمار کے ساتھ ہی بی جے پی کے رہنما سوشیل کمار مودی نے نائب وزیر اعلی کا حلف لیا ہے

انڈیا کی ریاست بہار کے وزیر اعلیٰ نتیش کمار نے بدھ کے روز اپنے عہدے سے مستعفی ہونے کے بعد لالو پرساد کے ساتھ اپنے اتحاد کو توڑ دیا تھا اور بھارتیہ جنتا پارٹی کے ساتھ مل کر نئی مخلوط حکومت بنا لی ہے۔

اس طرح نتیش کمار ریاست بہار کے 22 ویں وزیر اعلیٰ بن گئے ہیں اور چھٹی بار اس کا حلف لیا ہے۔ گورنر كیسری ناتھ ترپاٹھی نے پٹنہ کے راجندر پویلین ہال میں انھیں عہدے اور رازداری کا حلف دلایا۔

٭ لالو اور ملائم کی سیاست کا خاتمہ شروع؟

نتیش کمار کے ساتھ ہی بھارتیہ جنتا پارٹی کے رہنما سوشیل کمار مودی نے بھی نائب وزیر اعلیٰ کے عہدے کا حلف لیا ہے۔

وزیر اعظم نریندر مودی نے نتیش کمار کو بی جے پی کے ساتھ حکومت تشکیل دینے پر مبارک باد پیش کی ہے۔

تصویر کے کاپی رائٹ TWITTER @SUSHILMODI
Image caption بہار میں بی جے پی کی حکومت آنے سے وہ اور مضبوط ہوگئی ہے

اس سے پہلے بدھ کو لالو پرساد یادو کی پریس کانفرنس کے چند گھنٹوں بعد نتیش کمار نے 'اس ماحول میں کام کرنا ممکن نہیں' کہتے ہوئے وزیر اعلیٰ کے عہدے سے استعفیٰ دے دیا تھا۔

اس کے بعد دیر رات بی جے پی اور اپنی پارٹی جے ڈی یو کے ارکان اسمبلی کے ساتھ نتیش کمار گورنر ہاؤس گئے اور انھوں نے گورنر کو استعفیٰ سونپ دیا تھا۔

نتیش کے اس قدم کو کانگریس اور لالو پرساد یادو کی جماعت آر جے ڈی کے ساتھ ہونے والے اتحاد کو دھوکہ دینے اور عوام کے مینڈیٹ کو ٹھکرانے کے طور پر دیکھا جا رہا ہے۔

نتیش کمار کی جنتا دل یونائٹڈ اور بہار کے سابق وزیراعلیٰ لالو پرساد یادو کی راشٹریہ جنتا دل نے سنہ 2015 کے اسمبلی انتخابات سے پہلے اتحاد کیا تھا اور وزیر اعظم نریندر مودی کی زبردست مقبولیت کے باوجود بہار میں بی جے پی کو شکست دی تھی۔

تصویر کے کاپی رائٹ TWITTER @SUSHILMODI

لالو پرساد یادو اوران کے اہل خانہ کو بدعنوانی کے الزامات کا سامنا ہے اور اس پس منظر میں یہ مطالبہ کیا جارہا تھا کہ ان کے بیٹے تیجسوی یادو، جو ریاست کے نائب وزیر اعلیٰ ہیں، اپنے عہدے سے مستعفی ہو جائیں۔ لیکن لالو پرساد یادو کو یہ مطالبہ تسلیم نہیں تھا۔

نتیش کی پیدائش یکم مارچ 1951 میں پٹنہ کے بختیار پور میں ہوئی تھی۔ بہار کالج آف اجينيرگ، پٹنہ سے اپنی تعلیم مکمل کر نے کے بعد وہ 1985 میں سیاست میں آئے۔

نتیش کمار پہلے بی جے پی کے اتحادی تھے لیکن نریندر مودی کو وزیر اعظم کا امیدوار بنائے جانے کے بعد انھوں نے بی جے پی سے اپنا اتحاد ختم کر لیا تھا۔ گذشتہ کچھ عرصے سے ہی یہ قیاس آرائیاں جاری تھیں کہ وہ دوبارہ بی جے پی سے ہاتھ ملا سکتے ہیں۔

متعلقہ عنوانات

اسی بارے میں