کیفیات ایکسپریس کے کئی ڈبے پٹری سے اترنے کے باعث متعدد مسافر زخمی

تصویر کے کاپی رائٹ TWITTER/RAILMININDIA

انڈیا کی ریاست اترپردیش میں ہونے والے ریل کے ایک حادثے میں تقریبا دو درجن مسافر زخمی ہوئے ہیں۔ کیفیات ایکسپریس ٹرین دلی سے اعظم گڑھ جارہی تھی۔

یہ حادثہ بدھ کی صبح کانپور کے پاس اوریّا میں پیش آيا۔ ٹرین ایک ڈمپر سے ٹکرا گئی جس کی وجہ سے ریل کا انجن اور اس کی 10 بوگياں پٹری سے نیچے اتر گئے۔

محکمہ ریل کا کہنا ہے کہ اس حادثے میں 25 افراد زخمی ہوئے ہیں جن میں چار افراد کی حالت نازک ہے جبکہ 21 افراد کو معمولی چوٹیں آئی ہیں۔

تصویر کے کاپی رائٹ ABHAY TRIPATHI
Image caption انجن سمیت ٹرین کے دس ڈبے پٹری سے اتر گئے

زخمیوں کو مقامی سول ہسپتال میں بھرتی کیا گیا ہے اور ان کا علاج جاری ہے۔

شمال مرکزی ریلوے کے عوامی رابطے کے افسر امت مالویہ کے مطابق ٹرین حادثہ تقریبا تین بجے صبح اس وقت ہوا جب ایک ریلوے کراسنگ پر ڈمپر سے ٹرین کا انجن ٹکرا گیا۔ یہ ٹکّر اتنی زبردست تھی کہ ٹرین کے انجن کے ساتھ ساتھ کئی کوچ بھی پٹری سے اتر کر بکھر گئے۔

تصویر کے کاپی رائٹ ABHAY TRIPATHI
Image caption حادثہ علی الصبح پیش آیا

محکمہ ریل کے ڈی جی پی آر او انیل سکسینہ نے بی بی سی کو بتایا ہے کہ امدادی آپریشن جاری ہے اور وہاں خصوصی ٹرین بھیجی گئی ہے۔

ان کا کہنا تھا کہ یہ حادثہ دہلی اور ہاوڑہ کے روٹ پر ہوا ہے اس لیے اس روٹ کی دیگر ٹرینوں کے متاثر ہونے کا خدشہ ہے۔

حادثے کے بعد ریلوے کے وزیر سریش پربھو نے ٹویٹ کیا اور بتایا کہ کچھ مسافر زخمی ہوئے ہیں، ان کو نزدیکی ہسپتال میں داخل کرایا گیا ہے اور وہ ذاتی طور پر خود حالات اور امدادی کام کی نگرانی کر رہے ہیں۔

تصویر کے کاپی رائٹ ABHAY TRIPATHI

انڈیا میں گذشتہ ایک ہفتے میں ریاست اتر پردیش میں ٹرین کا یہ دوسرا حادثہ ہے۔

اس سے پہلے 19 اگست کی رات کو مظفر نگر کے کھتولی کے پاس ہونے والے ایک بھیانک حادثے میں 21 مسافر ہلاک ہوگئے تھے جبکہ درجنوں زخمی ہوئے تھے۔

متعلقہ عنوانات

اسی بارے میں